Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 240 Hüküm no: 233 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe b. Hacı Ali’nin kiracısı olup kendi mülkü olmak üzere inşa edeceği evin maliyetinin keşfi Husûs-ı âti’z-zikr mahallinde keşf ve tahrîri için savb-ı şer‘den Mevlânâ İmâmzâde Mehmed Emin Efendi irsâl olunup ol dahi mahmiye-i İstanbul’da Keçeci Pîrî Mahallesi’nde vâki‘ ve yine mahalle-i mezbûre avârızına mevkūf bir tarafdan Emetullah Hatun tasarrufunda olup yine mahalle-i mezbûre mescid-i şerîfi vakfı olan menzil ve bir tarafdan Kantarcı Yusuf Çelebi mülkü ve bir tarafdan tarîk-i hâs ve bir tarafdan tarîk-i âm ile mahdûd menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde menzil-i mezbûrun bi’l-fi‘il mütevellîsi olan el-Hâc Mustafa b. Ömer meclis-i ma‘kūd-ı mezbûrda menzil-i mezbûra bi’l-icâreteyn mutasarrıf olan İbrahim Beşe b. el-Hâc Ali mahzarında ikrâr ve takrîr-i kelâm edip işbu menzil-i mezbûr harâb <> ve mâil-i türâb olup ta‘mîre muhtâc olmağla mu‘accelesine mahsûb olmak üzere binâdan mutasarrıf olan mezbûr İbrahim Beşe ibâ edip ve taraf-ı vakfda dahi vüs‘at olmamağla hâlâ menzil-i mezbûru kendi mülkü olmak üzere müceddeden binâya mezbûr İbrahim Beşe’ye bi’t-tevliye izin ve temessük verip ol dahi nefsiʼçün binâya mübâşeret etmeğin menzil-i mezbûrun hükm-i enkāzda olan işbu harâb bir tahtânî oda ve sofası keşf ve tahmîn ve takvîm olunmak murâdımdır dedikde hâssa mi‘mâr halîfelerinden Şa‘ban Halîfe b. Abdullah ve Ali Halîfe b. Abdullah Müslimîn-i mezbûrîn muvâcehesinde mesâha ve takvîm eylediklerinden tûlen dokuz zirâ‘ ve arzen altı zirâ‘ bi-hesâb-ı terbî‘î elli dört zirâ‘ oda ve sakfın beher zirâ‘ı yirmi beşer akçeden bin üç yüz elli akçe ve bir mikdâr taş ve köhne kereste ber-vech-i tahmîn dört yüz elli akçe ki min-haysü’l-mecmû‘ menzil-i mezbûrun nıkzının kıymeti ancak bin sekiz yüz akçedir bundan ziyâde ve noksana tahammülü yokdur deyü mi‘mârân-ı mezbûrân ve Müslimîn-i mezbûrîn icmâ‘ u ittifâk eylediklerini mevlânâ-yı mezbûr mahallinde ketb ü tahrîr ba‘dehû ma‘an irsâl olunan Hüseyin b. Oruc ve diğer Hüseyin b. Hasan ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 9 min-Cumâdelûlâ sene 1121 Şuhûdü’l-hâl: Hasan Efendi b. Ali, Mustafa Çelebi b. Nurullah, Abdi Çelebi b. Mehmed, Mustafa Çelebi b. Hüseyin, İbrahim Çelebi b. el-Hâc Mustafa, Ali Çelebi b. Hasan, Abdullah b. Abdullah, Yusuf b. Abdullah, Mehmed Beşe b. Ali, Derviş b. Selim, Kara Mehmed b. Mahmud, Abdi b. İbrahim, el-Hâc Ali b. Şa‘ban ve gayruhum mine’l-huzzâr.