Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 241 Hüküm no: 234 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı âlî yeniçerileri başyazıcısı Ali Efendi b. Abdurrahman’ın evini Onuncu Ağa Bölüğü Nukud Vakfı’na sattığı Mahmiye-i İstanbul’da Oruc Gāzî Mahallesi’nde sâkin sâbıkā Dergâh-ı âlî yeniçerilerinin başyazcısı olan fahrü’l-akrân Ali Efendi b. Abdurrahman nâm kimesne tarafından husûs-ı âti’l-beyâna vekîl olduğu Mehmed Beşe b. Ali ve Ali Beşe b. Ahmed nâm kimesneler şehâdetleriyle şer‘an sâbit olan İbrahim Ağa b. el-Hâc Mehmed nâm kimesne meclis-i şer‘-i şerîf-i enverde Dergâh-ı âlî yeniçeri[le]rinin Onuncu Ağa Bölüğü’ne mahsûs oda mühimmâtına mevkūfe nukūdun bi’l-fi‘il mütevellîsi olan işbu râfi‘u’l-kitâb Hüseyin Beşe b. Ali nâm kimesne mahzarında ikrâr ve takrîr-i kelâm edip müvekkilim merkūm Ali Efendi târih-i kitâbdan altı sene mukaddem yedinde mülkü olup mahalle-i mezbûrede vâki‘ bir tarafdan Odabaşı mülkü ve bir tarafdan İsmail Ağa Vakfı ve bir tarafdan tarîk-i hâs ve bir tarafdan tarîk-i âm ile mahdûd dâhiliyede fevkānî iki bâb oda ve tahtânî iki bâb oda ve bir matbah ve bir kiler ve bir sofa ve tahta-pûş ve bir kenîf ve bir bi’r-i mâ ve hâriciyede fevkānî üç bâb oda ve tahtânî iki bâb oda ve kenîfi müştemil mülk menzilini bi-tarîkı’l-istiğlâl bin elli guruşa mütevellî-i mezbûr Hasan Beşe’ye bey‘ ve teslîm ol dahi bi’t-tevliye iştirâ ve kabûl ve tesellüm eyleyip meblağ-ı mezbûr bin elli guruşu müvekkilim merkūm mâl-ı vakf-ı mezbûrdan olmak üzere mütevellî-i mezbûr yedinden ahz u kabz eylediğinden sonra mütevellî-i mezbûr Hasan Beşe menzil-i mahdûd-ı mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i mezbûrdan bir sene tamamına değin müvekkilim merkūm Ali Efendi’ye yüz elli yedi buçuk guruşa îcâr ve teslîm ol dahi ber-vech-i muharrer istîcâr ve kabûl eyleyip asl-ı mâl-ı mezbûr bin elli guruş ve ücret-i mezbûre dahi yüz elli yedi buçuk guruş ki cem‘an zimmetinde taraf-ı vakfa bin iki yüz yedi buçuk guruş deyni olmağın hâlâ müvekkilim merkūm Ali Efendi menzil-i mezkûru bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile mütevellî-i mezbûra bin iki yüz yedi buçuk guruşa bey‘ ve teslîm ol dahi ber-vech-i muharrer vakıf için iştirâ ve tesellüm eyledikden sonra semen-i mezbûr bin iki yüz yedi buçuk guruşu vakfa deyni olan meblağ-ı mecmû‘-ı mezbûr bin iki yüz yedi buçuk guruşa takās eylediğinde ol dahi bi’t-tevliye mukāssa ve kabûl eyleyip baʻde’l-yevm menzil-i mahdûd-ı mezbûrda alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-Cumâdelûlâ sene 1121 Şuhûdü’l-hâl: Mehmed Beşe b. Ali, Ali Beşe b. Ahmed, Bayram b. ( ), el-Hâc Ahmed b. Abdullah, Sarrac Mehmed Çelebi, Hasan Odabaşı, İsmail Beşe b. Hasan, Mustafa Çelebi b. Şa‘ban, Ali Çelebi b. Bâli, Süleyman b. Abdullah, Ali b. Abdurrahman ve gayruhum mine’l-huzzâr.