Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 242 Hüküm no: 236 Orijinal metin no: [31a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye Hatun bt. İsmail’in geçinemediği kocasıyla boşandığı Mahmiye-i İstanbul’da Soğanağa Mahallesi sâkinelerinden olup zâtı İbrahim Ağa b. Abdullah ve Ömer Çelebi b. Ahmed ta‘rîfleriyle mu‘arrefe olan Raziye bt. İsmail nâm hatun meclis-i şer‘-i şerîf-i enverde zevci işbu râfi‘u’r-rakīm İbrahim Çelebi b. Mustafa mahzarında ikrâr ve takrîr-i kelâm edip mezbûr İbrahim Çelebi zevcim olup beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan bin iki yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzerime olup mezbûrun firâşından hâsıl ve benden mütevellid ve bi-hakkı’l-hıdâne hâlâ hacr u terbiyemde olan sadrî sagīr oğlum Mustafa’yı hakk-ı hıdâne sukūtuna değin kendi mâlımdan infâk ve iksâ etmek üzere zevcim mezbûr İbrahim Çelebi ile muhâla‘a-i sahîha-i şer‘iyye ile muhâla‘a olduğumda ol dahi vech-i muharrer üzere hul‘-ı mezkûru kabûl ettiğinden sonra hukūk-ı zevciyete müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 17 min-şehri Rebîʻülâhir sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Hasan Çelebi b. Mustafa, Osman b. Hasan ve gayruhum mine’l-huzzâr.