Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 243 Hüküm no: 237 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahim Efendi b. Mısırlı Hacı Mehmed b. Şa‘ban’ın Alaşehir’deki evini borcuna mahsuben Hacı Ali Ağa b. Mehmed’e sattığı Vilâyet-i Anadolu’da medîne-i Alaşehir’de Ebûberd Mahallesi ahâlîsinden olup mahmiye-i İstanbul’da Tevkī‘î Ca‘fer Mahallesi’nde müsâferet vechi üzere sâkin Abdurrahim Efendi b. Mısırlı el-Hâc Mehmed b. Şa‘ban nâm kimesne mahfil-i kazâda işbu râfi‘u’l-kitâb el-Hâc Ali Ağa b. Mehmed mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mârru’z--zikr Ebûberd Mahallesi’nde vâki‘ bir tarafdan li-ebeveyn karındaşı Mustafa Beşe mülkü ve bir tarafdan Topal Ali Beyzâde Mehmed Ağa vereseleri mülkleri ve bir tarafdan Mezid oğulları Kör Mehmed ve Ahmed mülkleri ve bir tarafdan [tarîk-ı] âm ile mahdûd dâhiliyede fevkānî iki bâb oda ve iki sofa ve tahtânî iki bâb oda ve hâriciyede iki bâb oda ve bir mikdâr havluyu müştemil mülk menzilimi bin yüz yirmi bir senesi Cumâdelâhire’si gurresinden bir sene tamamına değin bey‘ bi’l-vefâ tarîkı üzere mezbûr el-Hâc Ali Ağa’ya yüz otuz iki guruşa bey‘ eylediğimde ol dahi ber-vech-i muharrer iştirâ ve kabûl eylediğinden sonra semeni olan meblağ-ı mezbûr yüz otuz iki guruşu mezbûr el-Hâc Ali Ağa’ya cihet-i karzdan deynim olan seksen guruş ile yedinden iştirâ ve kabz eylediğim kırmızı çukaya kaplı bir Moskov nâfesi kürk semeninden elli iki guruş ki cem‘an zimmetimde deynim olan yüz otuz iki guruşa takās eylediğinde ben dahi mukāssa ve kabûl edip menzil-i mahdûd-ı mezkûru mahallinde zabt u tasarrufa mezbûr el-Hâc Ali Ağa’yı taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 min-Cumâdelûlâ sene 1121 Şuhûdü’l-hâl: Fahrü’l-kuzât Alaşehir muvakkiti İbrahim Efendi b. Mahmud Efendi, Umdetü’l-kuzâti’l-bedr Mehmed Efendi b. Müderris Mustafa Efendi, el-Hâc Mehmed Efendi b. el-Hâc Abdullah, Ahmed Efendi b. İbrahim Efendi, Mustafa Efendi b. İbrahim Efendi, Ali Çelebi tâbi‘-i İbrahim Efendi, Halil Ağa b. el-Hâc Ali Ağa, Ali Çelebi b. Bâli ve gayruhum mine’l-huzzâr.