Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 244 Hüküm no: 240 Orijinal metin no: [31b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe b. Mehmed b. Ramazan Hoca’nın vârislerinden hanımı Hadice bt. Salih’in kocasına borcu olan İpsala Kadısı Mehmed Şeyhî Efendi b. Salih’deki hissesini sulh yoluyla tahsil ettiği Mahmiye-i İstanbul’da Ali Paşa-yı Atîk Mahallesi ahâlîsinden olup vilâyet-i Rumeli’nde İpsala kasabasında bundan akdem fevt olan İbrahim Beşe b. Mehmed b. Rıdvan Hoca nâm kimesnenin verâseti zevce-i metrûkesi Hadice bt. Salih nâm hatun ile zî-rahm cihetinden eş-Şeyh Ali b. Ahmed b. Hasan nâm kimesneye münhasıra olduğu şer‘an zâhir ve mütehakkık oldukdan sonra zâtı ba‘de’t-ta‘rîfi’ş-şer‘î mezbûre Hadice Hatun meclis-i şer‘-i şerîf-i enverde sâbıkā İpsala kādısı olan işbu râfi‘u’l-kitâb Mehmed Şeyhî Efendi b. Salih mahzarında ikrâr ve takrîr-i kelâm edip zevcim müteveffâ-i mezbûr İbrahim Beşe hâl-i nefâz-ı sıhhatinde mâlından merkūm Mehmed Şeyhî Efendi’ye dört yüz elli üç buçuk guruş ikrâz ve teslîm ol dahi istikrâz ve kabz ve mesârifine sarfla istihlâk edip meblağ-ı mezbûrun üç yüz elli altı guruşunu hayâtında mezbûr Mehmed Şeyhî Efendi’den ahz ve istîfâ etmekle doksan yedi buçuk guruşu mezbûr Mehmed Şeyhî Efendi zimmetinde iken merkūm İbrahim Beşe fevt olmağla meblağ-ı bâkī-i mezbûr bi’l-verâse bize isâbet etmekle meblağ-ı merkūm doksan yedi buçuk guruşdan rub‘ hisseme isâbet eden yirmi dört buçuk guruşu merkūm Mehmed Şeyhî Efendi’den bundan akdem taleb ve da‘vâ eylediğimde ol dahi inkâr edip beynimizde nizâ‘-ı küllî cereyân etmişidi el-hâletü hâzihî muslihûn tavassut edip merkūm Mehmed Şeyhî Efendi da‘vâ-yı mezkûremden benimle yirmi buçuk guruş üzerine sulh olduğunda ben dahi vech-i meşrûh üzere sulh-ı mezbûru kabûl ve bedel-i sulh olan meblağ-ı mezbûr yirmi buçuk guruşu merkūm Mehmed Şeyhî Efendi bana def‘ ü teslîm ben dahi yedinden tamamen ahz u kabz eyledim baʻde’l-yevm meblağ-ı bâkī-i mezbûra müte‘allika olan âmme-i da‘vâdan merkūm Mehmed Şeyhî Efendi’nin zimmetini ibrâ-i âmm-ı râfi‘u’l-hısâm ile ibrâ ve iskāt eyledim dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 17 min-Cumâdelûlâ sene 1121 Şuhûdü’l-hâl: Mustafa Ağa el-Mübâşir, Mustafa b. Ahmed, Derzi Ali Çelebi, Ali Çelebi b. İvaz ve gayruhum mine’l-huzzâr.