Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 245 Hüküm no: 241 Orijinal metin no: [31b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Çelebi b. Mustafa’nın Sarıyer’de evini Ganence bt. Haçador ile kızı Moçod bt. Yani’ye sattığı Mahrûse-i Galata muzâfâtından İstinye nâhiyesine tâbi‘ Sarıyer nâm karye sükkânından Osman Çelebi b. Mustafa nâm kimesne meclis-i şer‘-i şerîf-i enverde mahmiye-i İstanbul’da Abdi Subaşı Mahallesi sâkinelerinden işbu rafi‘ateyi’s-sifr Ganence bt. Haçador ile mezbûrenin sadriye kızı Moçod bt. Yani nâm Nasrâniyeler taraflarından husûs-ı âti’z-zikri tasdîka vekîlleri olduğu zâtlarını ma‘rifet-i şer‘iyye ile ârifân Begos v. Melkon ve Mustafa Beşe b. Mehmed [32a] nâm kimesneler şehâdetleriyle şer‘an sâbit olan mezbûre Moçod’un zevci Ermiye v. Kaspar nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup zikri mürûr eden Sarıyer nâm karyede vâki‘ bir tarafdan İbrahim Reis mülkü ve bir tarafdan Ahmed Beşe menzili ve bir tarafdan Odabaşızâde İbrahim Çelebi menzili ve bir tarafdan tarîk-i hâs ile mahdûd fevkānî ve tahtânî iki bâb oda ve bir sofa ve bir kenîf ve bi’r-i mâ ve havlu ve bir mikdâr bahçeyi müştemil mülk menzilimi cemî‘ tevâbi‘ ve levâhıkıyla tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile müvekkiletân-ı mezbûretâna ale’l-iştirâki’s-seviyy yüz seksen beş guruşa bey‘ ve teslîm onlar dahi ber-vech-i muharrer iştirâ ve tesellüm ve temellük ve kabz ve kabûl ettiklerinden sonra semeni olan meblağ-ı mezbûr yüz seksen beş guruşun elli guruşunu yedlerinden ahz u kabz edip bâkī kalan yüz otuz guruşunu dahi târih-i kitâbdan yirmi bir gün tamamına değin tamamen edâ etmek üzere te’cîl eyledim fîmâ-ba‘d menzil-i mahdûd-ı mezkûr müvekkiletân-ı mezbûretânın iştirâk-i seviyy üzere mülk-i müşterâları ve hakk-ı sırfları olmuşdur keyfe mâ teşâ’ân ve tehtârân mutasarrıflar olsun dedikde gıbbe’t-tasdîkı’ş-şer‘î [mâ-vaka‘a bi’t-taleb ketb olundu.] Fî 17 min-Cumâdelûlâ sene 1121 Şuhûdü’l-hâl: Mustafa b. Şa‘ban, Ali b. İvaz, Çalık Mehmed Çelebi b. Mehmed, Hasan Çelebi b. Mustafa, Ali b. Bâli ve gayruhum mine’l-huzzâr. Bugün Pazartesi yarın Salı.