Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 251 Hüküm no: 251 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Mahmud Ağa b. Abdi’nin terekesinden olan evin bedelinin keşfi Husûs-ı âti’l-beyânın mahallinde keşf ü tahrîr ve takvîmi bâbında fermân-ı şerîf sâdır olmağın imtisâlen-leh savb-ı şer‘-i münîrden ta‘yîn ve irsâl olunan Mevlânâ Ali Efendi b. Sunullah hâlâ Ser-mi‘mârân-ı hâssa Mehmed Efendi b. Halil ve Mehmed Halîfe b. Ali ve Şa‘ban Halîfe ve Mi‘mâr kâtibi Mehmed Efendi ile mahmiye-i İstanbul’da Canbaziye Mahallesi’nde vâki‘ zikri câʻî menzile varıp zeyl-i kitâbda mektûbü’l-esâmî Müslimîn huzûrunda akd-i meclis-i şer‘-i nebevî eyledikde mahalle-i mezkûrede sâkin iken bundan akdem vefât eden Mahmud Ağa b. Abdi’nin verâseti zevceteyn-i metrûketeyn Ârife bt. Abdullah ve Âişe bt. Abdurrahman nâm hatunlar ile kebîre kızı Sâliha ve sagīr oğlu Mustafa Çelebi’ye münhasıra ve tashîh-i mes’eleleri kırk sekiz sehmden olup sihâm-ı mezkûreden üçer sehmi mezkûretân Ârife ve Âişe’den her birine ve yirmi sekiz sehmi mezkûr Mustafa Çelebi’ye ve on dört sehmi mezbûre Sâliha’ya isâbet eylediği şer‘an zâhir ve mütebeyyin oldukdan sonra mezkûre Sâliha’nın zevci ve tarafından husûs-ı âti’l-beyâna vekîl olduğu yedinde olan mazmûn-ı müsbet vekâlet hücceti nâtıka olduğu üzere şer‘an sâbit olan Müderris Mustafa Efendi b. Mehmed Efendi nâm kimesne meclis-i ma‘kūd-ı mezkûrda sagīr-i mezkûrun vâlidesi ve kıbel-i şer‘den mansûbe vasiyyesi olan mezkûre Ârife mahzarında bi’l-vekâle takrîr-i kelâm edip mahalle-i mezkûrede vâki‘ işbu akd-i meclis olunan mülk menzilin dâhiliyesi mezkûre Ârife’nin mülkü ve hâriciyesi sagīr-i mezkûrun mülkü olup bundan akdem vâki‘ olan harîkde muhterik oldukdan sonra müteveffâ-i mezkûr Mahmud Ağa dâhiliye ve hâriciyeli müceddeden işbu mu‘âyene olunan ebniyeyi binâ ve ihdâs ettirdip verese-i mezkûrûn beynlerinde iktisâm ve müteveffâ-i mezkûr Mahmud Ağa’nın mîrâsına idhâl murâd olundukda mezkûre Ârife ben zevcim müteveffâ-i mezkûr Mahmud Ağa’ya hayâtında kendi mâlımdan iki bin elli beş guruş def‘ ü teslîm ol dahi yedimden ahz u kabz ve menzil-i mezkûru benim mâlım ile benim için binâ ve ihdâs etmişdir deyü bizden da‘vâ ve müdde‘âsını şuhûd-ı udûl ile isbât edip lâkin hâlâ menzil-i mezkûr keşf ve takvîm olunup iki bin elli beş guruşdan ziyâde binânın kıymetinden hisse-i irsiyyemiz mütebeyyin ve müte‘ayyin olunmak bi’l-vekâle matlûbumdur dedikde mi‘mârûn-ı mezkûrûn mesâha ve takvîm eylediklerinde makaslamaları ada çubuğu ve merteklemesi çap ve verge tabanı ve kuşaklaması ve kirişlemesi beylik taban ve pedavra ve kiremidi cedîd tûlen yirmi beş ve arzen on dokuz buçuk [zirâ‘] bi-hesâb-ı şatrancî dört yüz seksen yedi zirâ‘ sakfın zirâ‘ı elli beşer akçeden yirmi altı bin yedi yüz seksen beş akçe ve câmekân tarafında vâki‘ bi-hesâb-ı mezkûr elli üç buçuk zirâ‘ sakfın zirâ‘ı kırkar akçeden iki bin yüz kırk akçe ve on bir verdinâr-ı kebîr dört yüz akçe ve devr şişeli la‘l boyalı lambalı bi-hesâb-ı mezkûr yetmiş zirâ‘ sâde tavanın zirâ‘ı altmışar akçeden dört bin iki yüz akçe ve bada[na]lı astarlı sekiz çift duvar camı altışar yüz akçeden dört bin sekiz yüz akçe ve dört çıkrıkçı işi parmaklık ve Arabî kanadlı pencere ikişer yüz sekiz akçeden bin yüz yirmi akçe ve Arabî kanadlı ve medîneli sekiz dolap üç bin akçe ve korluk taşı mevcûd ve müceddeden ot taşı ve devr davlunbazlı bir ocak ma‘a depe ber-vech-i tahmîn üç bin akçe ve bir Arabî kanadlı sandık dolap iki yüz akçe ve bir kapı ma‘a çârçûbe iki yüz akçeden bi-hesâb-ı mezkûr yetmiş sekiz zirâ‘ tahta döşemelik zirâ‘ı otuz beşer akçeden iki bin yedi yüz otuz akçe ve bi-hesâb-ı mezkûr otuz bir zirâ‘ gülvinin? zirâ‘ı yirmişer akçeden altı yüz yirmi akçe ve bi-hesâb-ı mezkûr otuz bir zirâ‘ medâhilin zirâ‘ı onar akçeden üç yüz on akçe ve iki tarafı beyaz sıvalı bi-hesâb-ı mezkûr yüz kırk altı zirâ‘ tuğla mahlût dolma duvarın zirâ‘ı otuz beşer akçeden beş bin yüz on akçe ve masandıra üzerinde beyaz sıvalı Bağdâdî kafes bi-hesâb-ı mezkûr on yedi buçuk zirâ‘ otuz beşer akçeden altı yüz on iki akçe ve bir kapı ma‘a boya üç yüz yirmi akçe ve kapı arasında dört zirâ‘ tavanın zirâ‘ı otuzar akçeden yüz yirmi akçe ve üç kademeli bir nerdübân yüz akçe ve orta kafesli ve nîm şişeli ve pervâzlı bi-hesâb-ı mezkûr altmış sekiz buçuk zirâ‘ tavanın zirâ‘ı kırkar akçeden iki bin yedi yüz kırk akçe ve zülbaharlı dört çift duvar camı dörder yüz akçeden bin altı yüz akçe ve bi hesâb-ı mezkûr altmış sekiz buçuk zirâ‘ tahta döşeme ma‘a kirişleme otuz beşer akçeden iki bin üç yüz doksan yedi akçe ve bi-hesâb-ı mezkûr yirmi bir zirâ‘ gelir ma‘a pervâz zirâ‘ı yirmişer akçeden altı yüz yirmi akçe ve bi-hesâb-ı mezkûr seksen beş zirâ‘ dolma duvarın zirâ‘ı otuz beşer akçeden iki bin beş yüz doksan akçe ve etrâfı sıvacı nakşı bi-hesâb-ı mezkûr yirmi dört zirâ‘ medâhilin zirâ‘ı onar akçeden iki yüz kırk akçe ve kapı üzerinde lâciverd boyalı hatâyî nakışlı iki zirâ‘ tâc yüz kırk akçe ve tarak nakışlı çifit yedi yüz yirmi akçe ve sülügen boyalı ve devr şişeli pervâzlı bi-hesâb-ı mezkûr altmış altı zirâ‘ tavanın zirâ‘ı kırkar akçeden iki bin altı yüz kırk akçe ve bi-hesâb-ı mezkûr altmış altı zirâ‘ tahta döşemenin zirâ‘ı otuz beşer akçeden iki bin üç yüz on akçe ve zülbaharlı bâdâmî astarlı altı çift duvar camı dörder yüz akçeden iki bin dört yüz akçe ve ağaç parmaklı Arabî kanadlı üç pencere sekiz yüz kırk akçe ve bi-hesâb-ı mezkûr yirmi sekiz zirâ‘ tarak alacası gülvinin? zirâ‘ı yirmişer akçeden beş yüz altmış akçe ve taban taşı atîk davlunbazlı cedîd bir ocak ma‘a depe bin beş yüz akçe ve bir Arabî kanadlı masandıra ve bir medîneli dolap ve bir kemer çârçûbeli kapı iki bin altı yüz kırk akçe ve tuğladan mahlût bi-hesâb-ı mezkûr altmış iki zirâ‘ dolma duvarın zirâ‘ı otuz beşer akçeden iki bin yüz yetmiş akçe ve bir Arabî kanadlı kapı ma‘a çârçûbe üç yüz yirmi akçe ve dehlîzde sülügen boyalı devr şişeli pervâzlı bi-hesâb-ı mezkûr yüz iki zirâ‘ tavanın zirâ‘ı kırkar akçeden dört bin seksen akçe ve bi-hesâb-ı mezkûr yüz iki zirâ‘ tahta döşeme ve kirişleme ma‘a beylik tabanın zirâ‘ı otuz beşer akçeden üç bin beş yüz yetmiş akçe ve yan sofasında lâciverd boyalı ve la‘l pervâzlı bi-hesâb-ı mezkûr yirmi sekiz buçuk zirâ‘ tavanın zirâ‘ı ellişer akçeden bin dört yüz yirmi beş akçe ve bi-hesâb-ı mezkûr yirmi sekiz buçuk zirâ‘ tahta döşemenin zirâ‘ı otuz beşer akçeden dokuz yüz doksan yedi akçe ve bi-hesâb-ı mezkûr yirmi beş zirâ‘ sıvacı nakışlı medâhilin zirâ‘ı onar akçeden iki yüz elli beş akçe ve on buçuk zirâ‘ gülvinin? zirâ‘ı yirmişer akçeden iki yüz on akçe ve gürgen çârçûbeli ve orta tahta ve seksen dört cam iki bin yedi yüz elli akçe ve bi-hesâb-ı mezkûr on dört zirâ‘ çifitin? zirâ‘ı otuz beşer akçeden dört yüz doksan akçe ve sülügen boyalı zülbaharlı tahta perde yüz altmış beş akçe ve bi-hesâb-ı mezkûr yirmi dört buçuk zirâ‘ dolma duvarın zirâ‘ı otuz beşer akçeden sekiz yüz elli yedi akçe ve aşı boyalı direkler arasında bi-hesâb-ı mezkûr yirmi beş zirâ‘ tahta perdenin zirâ‘ı yirmişer akçeden bin akçe ve kafes altında nîm şişeli aşı boyalı tahta perde bin üç yüz altmış beş akçe ve yeşil boyalı bi-hesâb-ı mezkûr otuz altı zirâ‘ havâle kafesinin zirâ‘ı kırk beşer akçeden bin altı yüz yirmi akçe ve dehlîzde dokuz orta direk ma‘a boya iki bin yüz altmış akçe ve altı orta sekiz taban ma‘a boya bin dört yüz kırk akçe ve nerdübân etrâfında sülügen boyalı tırabzan üç yüz akçe ve nerdübân üzerinde tahta dört buçuk zirâ‘ [33b] tahta perde altmış yedi akçe ve on bir zirâ‘ nîm şişeli tavanın zirâ‘ı kırkar akçeden dört yüz kırk akçe ve bi-hesâb-ı mezkûr on bir zirâ‘ tahta döşemenin zirâ‘ı otuz beşer akçeden üç yüz seksen beş akçe ve altmış dört zirâ‘ çifte servi tuğralı tavan ma‘a yelkovan zirâ‘ı otuz beşer akçeden iki bin iki yüz kırk akçe ve bi-hesâb-ı mezkûr yirmi iki zirâ‘ nîm şişeli bel tahtasının zirâ‘ı yirmi beşer akçeden beş yüz elli akçe ve dört İznikmid direği ma‘a boya dört yüz seksen akçe ve üç çifte çubuk ma‘a boya iki yüz elli akçe ve bi-hesâb-ı mezkûr taşı mevcûd kırk beş zirâ‘ taş duvarın zirâ‘ı otuzar akçeden bin üç yüz elli akçe ve taş odada bir ocak ma‘a depe sekiz yüz seksen akçe ve taş odanın on üç buçuk zirâ‘ devr kubbesi yüz otuzar akçeden bin dört yüz seksen beş akçe ve yüz doksan sekiz vakıyye kurşunun vakıyyesi yirmişer akçeden üç bin dokuz yüz altmış akçe ve on iki koltuk kemeri bin üç yüz otuz akçe ve taşı mevcûd ve tuğlası cedîd bi-hesâb-ı mezkûr yüz on zirâ‘ taş duvarın zirâ‘ı sekizer akçeden sekiz bin sekiz yüz akçe ve on zirâ‘ kirpi? cedîd yüz elli akçe ve bi-hesâb-ı mezkûr yirmi zirâ‘ kiremid ve sakf iki yüz altmış akçe ve bi-hesâb-ı mezkûr yüz yirmi zirâ‘ kiremid sakfı on üçer akçeden bin beş yüz altmış akçe ve müceddeden on bir tuğla ayak sekiz yüz seksen akçe ve mermer ve kaygan döşemelik ancak üstâdiyyesi beş yüz kırk akçe ve taşı mevcûd tuğlası cedîd bi-hesâb-ı mezkûr otuz beş zirâ‘ bölme duvarın zirâ‘ı yirmişer akçeden yedi yüz akçe ve su hazînesi üstünde dört buçuk zirâ‘ tolosun zirâ‘ı yüz yirmişer akçeden beş yüz kırk akçe ve yedi dirge tabanı yetmiş akçe ve bi-hesâb-ı mezkûr on iki zirâ‘ tekne kubbenin zirâ‘ı yüz onar akçeden bin üç yüz yirmi akçe ve çeşmede ancak kaygan döşemesi kırk akçe ve lâciverd boyalı ve devr şişeli bi-hesâb-ı mezkûr yirmi iki zirâ‘ tavanın zirâ‘ı ellişer akçeden bin yüz akçe ve yirmi iki zirâ‘ tahta döşeme yedi yüz yetmiş akçe ve çıkrıkçı işi parmaklık ma‘a kanad ve çârçûbe üç pencere sekiz yüz seksen akçe ve üç çift zülbaharlı duvar camı bin iki yüz akçe ve on üç zirâ‘ gelir iki yüz yetmiş akçe ve ancak elli zirâ‘ beyaz sıva üç yüz akçe ve on sekiz zirâ‘ sıvacı nakışlı medâhil onar akçeden yüz seksen akçe ve otuz zirâ‘ dolma duvarın zirâ‘ı otuz beşer akçeden bin elli akçe ve perde kemerli münakkaş kapı yüz elli akçe ve kapı üzerinde sıvacı nakışlı tâc elli akçe ve sekiz zirâ‘ dolma duvar otuz beşer akçeden iki yüz seksen akçe ve dört külhan teknesi iki yüz akçe ve dört kürsî taşı iki yüz akçe ve bir ot taban iki yüz akçe ve sekiz zirâ‘ kaygan döşemesi seksen akçe ve bi-hesâb-ı mezkûr seksen dört zirâ‘ sıvası tekne kubbenin zirâ‘ı yüz onar akçeden dokuz bin iki yüz kırk akçe ve orta peşgûnu dört yüz kırk akçe ve bi-hesâb-ı mezkûr yirmi iki zirâ‘ bölme duvarın zirâ‘ı kırkar akçeden sekiz yüz seksen akçe ve altı zirâ‘ kârgîr tuğla kemer dört yüz seksen akçe ve üç direk arasında tuğladan kemer dört yüz seksen akçe [Mühür:] ve hâlâ mevcûd iskele ber-vech-i tahmîn bin iki yüz akçe ve yirmi sekiz zirâ‘ kubbe tekne üç bin seksen akçe <> ve üç peşgûnu üç yüz akçe ve keresteden kalıp ber-vech-i tahmîn sekiz yüz akçe ve bi-hesâb-ı mezkûr doksan bir zirâ‘ nîm şişeli ve aşı boyalı tavan ma‘a sakf altmışar akçeden beş bin dört yüz altmış akçe ve sarı boyalı tuğralı bi-hesâb-ı mezkûr otuz beş zirâ‘ tavanın zirâ‘ı otuz beşer akçeden <> bin iki yüz yirmi beş akçe ve aşı boyalı bi-hesâb-ı mezkûr elli beş zirâ‘ tahta perdenin zirâ‘ı yirmi beşer akçeden bin üç yüz akçe ve aşı boyalı sekiz topaç sagīr direk dört yüz akçe ve dört ada çubuğu taban iki yüz kırk akçe ve dehlîzde bi-hesâb-ı mezkûr doksan dört zirâ‘ beyaz sıvanın zirâ‘ı altışar akçeden beş yüz altmış beş akçe ve mahall-i mezkûrda dört zirâ‘ duvarı yüz yirmi akçe ve ot taşından altı söğe taşı altı yüz akçe ve yüz on müdevver havâle camı altı yüz altmış akçe ve dört kademeli bir taş nerdübân üstâdiyesi ve harcı yüz yirmi akçe ve karaağaç tahtasından altı kapaklama on üç kademeli bir nerdübân ma‘a tırabzan iki bin akçe ve yedi zirâ‘ aşı boyalı tırabzan üç yüz on beş akçe ve iki Akçaşar direği yirmi akçe ve üç ada çubuğu ma‘a boya yüz altmış akçe ve sahn-ı nerdübânda on dört zirâ‘ tahta döşemenin zirâ‘ı otuz beşer akçeden dört yüz doksan akçe ve iki billûr cam yüz yirmi akçe ve bi-hesâb-ı mezkûr yirmi zirâ‘ dolma duvar ma‘a sıva yedi yüz akçe ve camsız iki gürgen çârçûbe iki yüz kırk akçe ve dokuz Bartın direği yüz otuz beş akçe ve yirmi zirâ‘ beyaz sıva yüz elli akçe ve nerdübân altında kömürlükde on bir zirâ‘ dolma duvarın zirâ‘ı otuzar akçeden üç yüz altmış akçe ve aşı boyalı tahtadan bir kapı elli akçe ve bi-hesâb-ı mezkûr iki yüz dört zirâ‘ tavanın zirâ‘ı yirmi beşer akçeden üç bin yüz akçe ve çıkrıkçı işi sekiz pencere altı yüz kırk akçe ve sekiz duvar camı bin yüz yirmi akçe ve üç kapı ma‘a kemer çârçûbe üç yüz altmış akçe ve bi-hesâb-ı mezkûr yüz yetmiş altı zirâ‘ dolma duvarın zirâ‘ı otuz beşer akçeden altı bin yüz altmış akçe ve cam tahtasından kanadlı iki masandıra ve iki medîne bin dört yüz kırk akçe ve bi-hesâb-ı mezkûr yüz yirmi sekiz zirâ‘ tahta döşemenin zirâ‘ı otuzar akçeden üç bin sekiz yüz kırk akçe ve bi-hesâb-ı mezkûr yirmi dört zirâ‘ aşı boyalı gülvi? dört yüz seksen akçe ve oda kapısı arasında nîm şişeli aşı boyalı on iki zirâ‘ tahtanın zirâ‘ı otuzar akçeden üç yüz altmış akçe ve bi-hesâb-ı mezkûr taşı mevcûd iki yüz doksan iki zirâ‘ taş duvarın zirâ‘ı otuzar akçeden sekiz bin yedi yüz altmış akçe ve kırk beş zirâ‘ aşı boyalı ve nîm şişeli tahta perdenin zirâ‘ı yirmi beşer akçeden bin iki yüz yirmi beş akçe ve çifte sekiz dokuz taban iki bin beş yüz yirmi akçe ve tahtânîde bir çeşme etrâfı dolma duvar bin dört yüz yetmiş akçe ve iki çeşme kubûru dokuz yüz kırk beş akçe ve mahzen derûnunda bi-hesâb-ı mezkûr otuz bir zirâ‘ toloslamanın zirâ‘ı yüz onar akçeden üç bin dört yüz on akçe ve üç kapı kemeri üç yüz otuz akçe ve nerdübân üstâdiyesi ma‘a sahn yüz yirmi akçe ve bahçede taşı mevcûd hatılı cedîd bi-hesâb-ı mezkûr yüz seksen zirâ‘ taş duvarın zirâ‘ı otuzar akçeden beş bin dört yüz akçe ve duvar-ı mezkûr üzerinde sakf ve kiremid beş yüz kırk akçe ve kapı üzerinde dört buçuk zirâ‘ tuğladan kemer yüz onar akçeden dört yüz doksan beş akçe ve otuz zirâ‘ sâde tavanın zirâ‘ı ellişer akçeden bin beş yüz akçe ve çârçûbesi İznikmid direği ve iki Arabî kanadlı orta kapısının iki yüz on akçe ki menzil-i mezkûru dâhiliye-i mezkûresin ber-vech-i meşrûh ebniyesi iki yük on beş bin üç yüz altmış dokuz akçeye bâliğ olduğu zâhir ve mütebeyyin oldukdan sonra mi‘mârûn-ı mezkûrûn hâriciye-i mezkûreyi mesâha ve takvîm eyledikleri üzere tûlen ve arzen bi-hesâb-ı mezkûr üç yüz elli dört zirâ‘ sakfın zirâ‘ı elli beşer akçeden [34a] on dokuz bin dört yüz yetmiş akçe ve altmış sekiz zirâ‘ tuğra tavanın zirâ‘ı kırkar akçeden iki bin yedi yüz yirmi akçe ve la‘lî boyalı ve nîm şişeli ve lamba pervâzlı bi-hesâb-ı mezkûr altmış bir zirâ‘ tavanın zirâ‘ı altmışar akçeden üç bin altı yüz altmış akçe ve altmış bir zirâ‘ tahta döşemenin zirâ‘ı otuz beşer akçeden iki bin yüz otuz beş akçe ve zülbaharlı beş çift duvar camı iki bin akçe ve çıkrıkçı işi parmaklık ve ardı pedavra baskılı beş buçuk pencere üçer yüz akçeden bin altı yüz elli akçe ve camları orta tahta beş buçuk çârçûbe bin beş yüz kırk akçe ve tarak nakışlı gülvi? ma‘a pervâz beş yüz kırk akçe ve bir ocak ma‘a depe iki bin beş yüz akçe ve nakışlı on sekiz zirâ‘ çifir beş yüz kırk akçe ve bi-hesâb-ı mezkûr yüz otuz bir zirâ‘ dolma duvarın zirâ‘ı otuzar akçeden dört bin beş yüz seksen beş akçe ve on sekiz zirâ‘ sıva ma‘a binârlama altı yüz seksen akçe ve Arabî kanadlı bir masandıra ve iki kapı iki bin üç yüz on akçe ve Arabî kanadlı ve kemer çârçûbeli bir kapı üç yüz yirmi akçe ve sülügen boyalı ve devr şişeli bi-hesâb-ı mezkûr kırk buçuk zirâ‘ tavanın zirâ‘ı kırkar akçeden bin altı yüz yirmi akçe ve bi-hesâb-ı mezkûr kırk buçuk zirâ‘ tahta döşemenin zirâ‘ı otuz beşer akçeden bin dört yüz on yedi akçe ve Arabî kanadlı ve çıkrıkçı işi iki pencere beş yüz altmış akçe ve iki billûr duvar camı dörder yüz akçeden sekiz yüz akçe ve yirmi bir zirâ‘ sâde açma sülügen boyalı gülvinin? zirâ‘ı otuzar akçeden dört yüz kırk akçe ve bir masandıra ma‘a dolap bin üç yüz yirmi akçe ve bi-hesâb-ı mezkûr seksen dört buçuk zirâ‘ dolma duvarın zirâ‘ı otuz beşer akçeden iki bin dokuz yüz elli beş akçe ve bir sâde ocak altı yüz akçe ve bir Arabî kanadlı kapı üç yüz yirmi akçe ve iki zirâ‘ tahta perde doksan akçe ve çeşmede aşı boyalı tavan iki yüz seksen akçe ve bir çift billûr cam iki yüz akçe ve kayganı mevcûd döşeme iki yüz seksen akçe ve on zirâ‘ tahta döşeme dört yüz doksan akçe ve bir kemer çârçûbeli Arabî kapı üç yüz akçe ve elli dokuz zirâ‘ kara sıva dolma duvarın zirâ‘ı yirmi beşer akçeden bin dört yüz yetmiş beş akçe ve kemer çârçûbeli ve boyalı müceddeden bir kapı üç yüz yirmi akçe ve bi-hesâb-ı mezkûr boğça nakışlı ve çengâr boyalı bi-hesâb-ı mezkûr yirmi altı buçuk zirâ‘ tavanın zirâ‘ı kırk beşer akçeden bin yüz doksan iki akçe ve bi-hesâb-ı mezkûr yirmi altı buçuk zirâ‘ tahta döşemenin zirâ‘ı otuz beşer akçeden dokuz yüz yirmi yedi akçe ve yirmi bir zirâ‘ iki kat dolma duvarın zirâ‘ı otuz beşer akçeden yedi yüz otuz beş akçe ve on bir Arabî kanadlı pencere altı yüz akçe ve on bir zirâ‘ tarak nakışlı gülvi? iki yüz akçe ve on beş bâdâmî burmalı çifit altı yüz akçe ve bi-hesâb-ı mezkûr sülügen boyalı zülbaharlı otuz zirâ‘ tahta perdenin zirâ‘ı otuzar akçeden dokuz yüz akçe ve bi-hesâb-ı mezkûr elli dört zirâ‘ devr şişeli sülügen boyalı tavanın zirâ‘ı kırkar akçeden iki bin iki yüz akçe ve bi-hesâb-ı mezkûr elli beş zirâ‘ döşemenin zirâ‘ı otuz beşer akçeden bin dokuz yüz yirmi beş akçe ve dokuz yalnız sekiz direk ma‘a tahta kaplama üç yüz akçeden iki bin yedi yüz akçe ve taban için altı yalnız sekiz akçeden bin sekiz yüz akçe ve yirmi dört zirâ‘ aşı boyalı bel tahtası yirmi beşer akçeden altı yüz akçe ve yirmi dört zirâ‘ tahta perdenin zirâ‘ı otuzar akçeden yedi yüz yirmi akçe ve yedi zirâ‘ tırabzan kırkar akçeden iki yüz seksen akçe ve karaağaç tahtasından on bir kademeli bir nerdübân dört yüz kırk akçe ve sekiz zirâ‘ tırabzan üç yüz yirmi akçe ve kirişleme beylik taban üç yüz akçe ve nerdübân başında bir direk elli akçe ve aşı boyalı bir ada çubuğu seksen akçe ve bir odada ve dehlîzde ve çeşmede bi-hesâb-ı mezkûr yüz doksan iki zirâ‘ tahta döşemenin zirâ‘ı otuz beşer akçeden altı bin yedi yüz yirmi akçe ve bi-hesâb-ı mezkûr sâde tuğladan yüz bir zirâ‘ dolma duvarın zirâ‘ı yirmi beşer akçeden iki bin beş yüz yirmi beş akçe ve çam tahtasından boyasız sekiz pencere kanadı sekiz yüz akçe ve dirge çârçûbeli bir tahta kapı yüz seksen akçe ve nîm şişeli ve aşı boyalı elli iki buçuk zirâ‘ tavanın zirâ‘ı yirmişer akçeden bin kırk akçe ve iki kat tahta döşemeli kanadsız masandıra ve dolap dört yüz on akçe ve dört buçuk zirâ‘ tahta perde altmış yedi akçe ve çam tahtasından yirmi zirâ‘ bel tahtası üç yüz akçe ve aşı boyalı orta topaç dokuz direk beş yüz kırk akçe ve taşı mevcûd sahn-ı nerdübân üstâdiyesi seksen akçe ve taşı mevcûd taş duvar üstâdiyesi kırk beş akçe ve ahırda taşı mevcûd bi-hesâb-ı mezkûr yetmiş altı zirâ‘ taş duvarın zirâ‘ı otuzar akçeden iki bin iki yüz seksen akçe ve duvar arasında altı topaç direk altı yüz akçe ve bir verdinâr tabanı dört yüz akçe ve yedi orta topaç direk kırkar akçeden dört yüz yirmi akçe ve iki ada çubuğu yüz altmış akçe ve direkler tahtında otuz zirâ‘ taş duvarın zirâ‘ı otuzar akçeden dokuz yüz akçe ve bir ada çubuğu yetmiş akçe ve bir destek yetmiş akçe ve on beş zirâ‘ Bağdâdî sıvalı tavan üç yüz akçe ve taşı mevcûd ve hatıllı ve pûşdevânî? cedîd bi-hesâb-ı mezkûr yüz yirmi zirâ‘ duvarın zirâ‘ı otuzar akçeden üç bin altı yüz akçe ve kiremid akdarması yüz seksen akçe ki min-haysü’l-mecmû‘ ber-vech-i meşrûh ve mübeyyin hâriciye-i mezkûrenin kıymeti doksan altı bin beş yüz otuz beş akçeye bâliğ olduğu zâhir ve bâhir oldukdan sonra cem‘an dâhiliye ve hâriciyenin keşiflerinden üç yük on bir bin dokuz yüz dört akçeye bâliğ olduğunu mevlânâ-yı mezbûr mahallinde ketb ü tahrîr edip ba‘dehû ma‘an irsâl olunan el-Hâc Hüseyin b. Abdullah ve diğer Hüseyin b. Hasan ile meclis-i şer‘a gelip her biri alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 3 min-Cumâdelûlâ sene 1121 Şuhûdü’l-hâl: Kırımî Müderris Mehmed Efendi, İmâm Mahmud Efendi b. Şa‘ban, Müezzin İbrahim Çelebi b. Mehmed, Mehmed Ağa b. Hüseyin, Ramazan Çelebi b. Ahmed, Mustafa Çelebi b. Ahmed, Abdüllatif Efendi b. Mehmed, İbrahim Çelebi b. Abdullah, Eyüb Çelebi b. Hızır, Yusuf Çelebi b. Abdullah ve gayruhum mine’l-huzzâr. Sah, sah, sah, sah