Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 258 Hüküm no: 252 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demirci Bayram b. Latif’in vefât eden Demirci Ahmed b. Abdullah b. Abdurrahman’daki alacağının terekesinden ödenmesi Mahmiye-i İstanbul’da Sultan Mehmed Hân Câmi‘-i şerîfi kurbünde sâkin demirci tâifesinden Bayram b. Latif nâm kimesne meclis-i şer‘-i hatîr-i lâzımü’t-tevkīrde yine demirci tâifesinden olup bundan akdem vefât eden Ahmed b. Abdullah b. Abdurrahman’ın zevce-i metrûkesi Emine bt. Mehmed nâm hatun mahzarında üzerine da‘vâ ve takrîr-i kelâm edip mezbûre Emine Hatun’un zevci müteveffâ-i mezbûr Ahmed b. Abdullah b. Abdurrahman zimmetinde dükkân âlâtı bahâsından elli beş guruş hakkım olup hayâtında bi’d-defa‘ât yirmi sekiz buçuk guruşunu ahz bâkī zimmetinde yirmi altı buçuk guruş olmağla tereke-i müteveffâ-i mezbûra merkūme Emine Hatun vâzı‘atü’l-yed olmağla taleb elediğimde edâdan imtinâ‘ eder suâl olunup tereke-i vâfiyesinden alıverilmek matlûbumdur dedikde gıbbe’s-suâl merkūme Emine cevâbında tereke-i müteveffâ-i merkūma vâzı‘atü’l-yed olduğunu ikrâr lâkin deyn-i mezkûru <> inkâr edicek müdde‘î-i merkūm Bayram’dan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden tâife-i mezbûreden Usta Mehmed b. Ahmed ve İbrahim Beşe b. İbrahim ve Usta Ali b. Mustafa nâm kimesneler li-ecli’ş-şehâde meclis-i şer‘a hâzirûn olup istişhâd olunduklarında fi’l-hakīka müteveffâ-i mezbûr Ahmed b. Abdullah b. Abdurrahman hâl-i hayâtında ve kemâl-i akl-ı sıhhatinde târih-i kitâbdan bir sene mukaddem müdde‘î-i merkūm Bayram’a dükkân âlâtı bahâsında elli beş guruş deyni olup ve bi’d-defa‘ât bizim yanımızda yirmi sekiz buçuk guruşunu teslîm bâkī zimmetimde yirmi altı buçuk guruş deynim vardır deyü ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle baʻde’l-hükm tereke-i müteveffâ-i mezbûrdan meblağ-ı merkūm yirmi sekiz [altı] buçuk guruşu edâ ve teslîme merkūme Emine Hatun’a tenbîh-birle mâ-vaka‘a bi’t-taleb ketb olundu. Fî 13 min-Cumâdelûlâ sene 1121 Şuhûdü’l-hâl: el-Hâc Hasan Beşe Çukadâr, Ahmed Çelebi b. Ali, Süleyman Çelebi b. Abdullah, Ahmed Beşe Demirci, Usta Hasan b. Abdullah Demirci ve gayruhum mine’l-huzzâr.