Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 259 Hüküm no: 253 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Receb’in evini sattığı Mehmed Efendi b. Ahmed Efendi ile fâhiş fiyata satış yapıldığı davasında sulh oldukları, Fâtıma’nın kızı Emetullah’ın da evin kendisine hibe edildiğine dair açtığı davadan vazgeçtiği Mahmiye-i İstanbul’da Uzun Yusuf Mahallesi sâkinelerinden Fâtıma bt. Receb nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde işbu râfi‘u’l-kitâb mahalle-i mezkûre imâmı Mehmed Efendi b. Ahmed Efendi muvâcehesinde bi-tav‘ihâ ikrâr-ı tâm ve takrîr-i kelâm edip târih-i kitâb senesi Saferi’l-hayr’ının yirmi altıncı günü mahalle-i mezkûrede vâki‘ bir tarafdan tarîk-i âm ve bir tarafdan hâs ve bir tarafdan hâlâ benim mülküm olan menzil-i mezbûr ve bir tarafdan Ali Bey nâm kimesne mülkü ile mahdûd tahtânî bir oda ve bir sagīr matbah ve bir sagīr ahır ve zât-ı eşcâr-ı müsmire ve gayr-ı müsmireli bahçeyi muhtevî mülk menzilimi mezkûr Mehmed Efendi’ye doksan bir guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl ve semeni olan meblağ-ı mezkûru merkūm Mehmed Efendi yedinden tamamen ahz u kabz ettiğimden sonra bey‘-i mezkûr tağrîr ve gabn-i fâhiş ile olmuş idi deyü mezkûr Mehmed Efendi’den mûceb-i şer‘îsini taleb ve da‘vâ ve menzil-i mahdûd-ı mezkûru ber-mûceb-i fermân-ı şerîf keşf ve takvîm ve menzil-i mezkûrun cümle ebniyesi ancak on iki bin altı yüz yetmiş altı akçeye bâliğ olup meblağ-ı mezkûrdan mezbûr Mehmed Efendi’nin masrûfu ihrâc olunup ancak on bir bin dokuz yüz elli yedi akçe bâkī kaldığı mütebeyyin oldukdan sonra beynimize muslihûn tavassut edip da‘vâ-yı mezkûremden beni mezkûr Mehmed Efendi ile on guruş üzerine sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezkûr on guruşu mezkûr Mehmed Efendi yedinden tamamen ahz u kabz eyledim baʻde’l-yevm menzil-i mezkûra ve tağrîr ve gabn-i fâhiş da‘vâsına müte‘allika âmme-i da‘vâ ve kâffe-i mutâlebâtdan mezkûr Mehmed Efendi’nin zimmetini ibrâ-i âmm-ı kātı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mezkûre Fâtıma’nın kızı Emetullah nâm hatun ba‘de’t-ta‘rîfi’ş-şer‘î meclis-i şer‘de mezkûr Mehmed Efendi muvâcehesinde takrîr-i kelâm edip menzil-i mahdûd-ı mezkûru bey‘-i merkūmdan mukaddem vâlidem mezkûre bana hibe ve temlîk ve teslîm etmişidi deyü mezkûr Mehmed Efendi’den da‘vâ sadedinde olmuşidim el-hâletü hâzihî da‘vâ-yı mezkûremden fâriğa olup husûs-ı mezkûra müte‘allika da‘vâdan mezbûr Mehmed Efendi’nin zimmetini ibrâ ve iskāt eyledim dedikde mâ-hüve’l-vâki‘ bi’t-taleb ketb olundu. Fî 19 min-Cumâdelûlâ sene 1121 Şuhûdü’l-hâl: Osman Efendi b. İsmail el-İmâm, Mehmed Efendi b. Ali el-İmâm, Mustafa Efendi b. Mehmed el-Müezzin, Ahmed Bey b. İbrahim, İbrahim Çelebi. b. İsmail, İbrahim Çelebi b. Mehmed, el-Hâc Mehmed b. Şa‘ban, Hüseyin Efendi b. Abdullah, Hüseyin Efendi b. Abdullah, İbrahim Çelebi b. Mehmed, el-Hâc İsmail b. Mehmed, Ahmed Çelebi b. Yusuf, Halil Efendi b. Ahmed el-Müezzin, İbrahim Çelebi b. Mustafa, Mustafa Çelebi b. Hasan, Mehmed Bey b. Veli, Ali Ağa b. Ahmed, Berber Ali Çelebi b. Ahmed, el-Hâc Mehmed b. İbrahim ve gayruhum mine’l-huzzâr.