Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 260 Hüküm no: 254 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Mustafa b. Ömer’in kendi mülkü olmak üzere Kara Ali Bey Vakfı’ndan olup yanan eve yaptığı harcamaların tespiti Hilâl-i sütûrda mastûr olan husûsu mahallinde keşf ü tahrîr ve takvîmi bâbında fermân-ı şerîf sâdır olmağın imtisâlen-leh savb-ı şer‘-i enverden irsâl olunan Mevlânâ Ali Efendi hâssa mi‘mârlardan Hasan Halîfe ve es-Seyyid Şa‘ban Halîfe ile mahmiye-i İstanbul’da Molla Hüsrev Mahallesi’nde vâki‘ zikri âtî menzile varıp zeyl-i kitâbda mektûbü’l-esâmî Müslimîn huzûrunda akd-i şer‘-i nebevî eyledikde Keresteci el-Hâc Mustafa b. Ömer nâm kimesne meclis-i ma‘kūd-ı mezkûrda mahalle-i mezkûre imâmı ve zikri câʻî vakfa mütevellî olan Halil Efendi b. İbrahim Efendi muvâcehesinde takrîr-i kelâm edip ashâb-ı hayrâtdan merhûm Kara Ali Bey nâm sâhibü’l-hayrın gallesi mahalle-i mezkûrede imâm ve müezzin olanlara ve tevliyeti ancak imâm olanlara meşrûta vakfı olup ma‘lûmü’l-hudûd menzil bundan akdem vâki‘ olan harîkde muhterik olup arsa-yı sırfa kaldıkda cânib-i vakfda binâya bir vechile müsâ‘ade olmayıp ve icâre-i mu‘accelesine mahsûb olmak üzere binâya tâlibi dahi olmamağla kendi mâlım ile mülküm olmak üzere binâya mütevellî-i mezkûr bana izin verip ben dahi mâlım ile mülküm olmak üzere işbu mu‘âyene olunan binâyı ihdâs etmişimdir hâlâ keşf ve tahmîn ve takvîm olunmak murâdımdır dedikde mi‘mârân-ı mezkûrân keşf ve mesâha ve takvîm eyledikleri üzere tûlen on sekiz ve arzen yeri buçuk bi-hesâb-ı şatrancî yüz otuz beş zirâ‘ sakfın zirâ‘ı kırkar akçeden beş bin dört yüz akçe ve sülügen çengârî boyalı bi-hesâb-ı mezkûr yetmiş yedi zirâ‘ tavanın zirâ‘ı ellişer akçeden üç bin sekiz yüz elli akçe ve ağa tahtasından döşeme beylik taban kirişleme bi-hesâb-ı mezkûr yetmiş yedi zirâ‘ tahta döşemenin zirâ‘ı otuz beşer akçeden iki bin altı yüz doksan beş akçe ve tûlen ve kadden bi-hesâb-ı mezkûr üç yüz kırk dokuz zirâ‘ dolma duvarın zirâ‘ı kırkar akçeden on üç bin dokuz yüz altmış akçe ve dört Arabî kanadlı sandık dolap bin iki yüz akçe ve bir medîne altmış akçe ve zemîn masandıra kafesli ve nakışı ber-vech-i tahmîn iki bin dört yüz akçe ve bi-hesâb-ı mezkûr otuz iki zirâ‘ gülvinin? zirâ‘ı on beşer akçeden dört yüz seksen akçe ve çıkrıkçı işi parmaklık ve Arabî kanadlı on pencere ve çârçûbe ma‘a cam üç bin altı yüz akçe ve on dört çift duvar camı ikişer yüz kırkar akçeden üç bin üç yüz altmış akçe ve mermer korluk ve koltuklu bir ocak ma‘a depe bin iki yüz akçe ve Arabî kanadlı bir kemer kapı üç yüz akçe ve dehlîzde olan bi-hesâb-ı mezkûr on sekiz zirâ‘ çârçûbe ma‘a cam doksanar akçeden bin altı yüz yirmi akçe ve dört zirâ‘ tırabzan seksen akçe tahta kaplı on bir kademeli bir nerdübân beş yüz akçe ve bi-hesâb-ı mezkûr yetmiş yedi zirâ‘ tahta döşemenin zirâ‘ı otuz beşer akçeden iki bin altı yüz doksan beş akçe [35a] ve sülügen çengâr boyalı bi-hesâb-ı mezkûr on dört zirâ‘ tahta perdenin zirâ‘ı otuzar akçeden dört yüz yirmi akçe ve bir tahta-pûş ma‘a tırabzan ber-vech-i tahmîn bin üç yüz akçe ve iki Arabî kanadlı kemer kapı altı yüz akçe ve üç tahta kapı dört yüz elli akçe ve iki sagīr dolap yüz akçe ve bir kârgîr matbah ocağı ma‘a depe iki bin akçe ve bir sâde masandıra yedi yüz akçe ve yirmi bir zirâ‘ gülvinin? zirâ‘ı on beşer akçeden üç yüz on beş akçe ve iki Arabî kanadlı sandık dolap altı yüz akçe ve bir ocak ma‘a depe altı yüz akçe ve dört zirâ‘ tırabzan seksen akçe ve on bir kademeli bir nerdübân dört yüz akçe ve bi-hesâb-ı mezkûr yirmi sekiz zirâ‘ dolma duvarın zirâ‘ı kırkar akçeden bin yüz yirmi akçe ve bi-hesâb-ı mezkûr yüz doksan iki zirâ‘ taş duvarın zirâ‘ı altmışar akçeden on bir bin beş yüz yirmi akçe ve bir kiler dolabı altı yüz akçe ve bir matbah ocağı ma‘a depe üç bin akçe ve iki tel eğrisi üç yüz akçe ve sahn-ı nerdübânda altı zirâ‘ döşeme yüz seksen akçe ve bir sokak kapısı bin iki yüz akçe ve bir orta kapı altı yüz akçe ve on beş kademeli bir nerdübân beş yüz akçe ve bi-hesâb-ı mezkûr altmış altı zirâ‘ kârgîr mahzen duvarı yüzer akçeden altı bin altı yüz akçe ve bi-hesâb-ı mezkûr otuz altı zirâ‘ toloslama yüz altmışar akçeden beş bin yedi yüz altmış akçe ve bir demir kapı ot taşından çârçûbesiyle üç bin akçe ve bi-hesâb-ı mezkûr otuz altı zirâ‘ kaldırımın zirâ‘ı on ikişer akçeden dört yüz otuz iki akçe ve bir su kuyusu iki bin akçe ve iki kenîf bin akçe ve iki demir parmaklık dört yüz akçe ve bir döşeme dolap yüz seksen akçe ve bi-hesâb-ı mezkûr yirmi dört zirâ‘ tahta perde yirmişer akçeden dört yüz seksen akçe ve bir mağsel altı yüz akçe ki min-haysü’l-mecmû‘ ebniye-i mezkûrenin kıymeti bir yük dört bin doksan iki akçe olduğu zâhir ve mütebeyyin olup ba‘dehû ihrâc-ı mezbele için iki bin dört yüz akçe dahi zam ve ilhâk olunduğunu mevlânâ-yı mezkûr mahallinde ketb ü tahrîr edip ve ma‘an irsâl olunan el-Hâc Hasan b. Osman ve Hüseyin b. Hasan ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 20 min-Cumâdelûlâ sene 1121 Şuhûdü’l-hâl: Halil Efendi b. İbrahim el-İmâm, el-Hâc Mustafa Efendi b. Mustafa, Ali Çelebi b. Mehmed, Ali b. Abdullah, el-Hâc İbrahim b. Resul, el-Hâc İbrahim b. Mehmed, Mehmed Çelebi b. Salih, Hasan Çelebi b. Mehmed, Mustafa Çelebi b. Mehmed, Ali Çelebi b. Mehmed, es-Seyyid Abdurrahman Çelebi b. Ömer, Mehmed Çelebi b. Ali, es-Seyyid Ahmed Çelebi b. Ali, Ahmed Çelebi b. Halil, es-Seyyid Ömer Çelebi b. es-Seyyid Abdurrahman, Süleyman Çelebi b. Ali, es-Seyyid Abdullah Çelebi b. es-Seyyid Mustafa, es-Seyyid el-Hâc Ahmed b. Halil ve gayruhum mine’l-huzzâr.