Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 262 Hüküm no: 255 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı İbrahim Efendi b. Süleyman’ın Tercüman Yunus Mahallesi’ndeki evini mahalle vakfı adına mütevellîsi Süleyman Çelebi b. Ahmed’e istiğlal yolu ile sattığı Mahmiye-i İstanbul’da Tercümân Yunus Mahallesi’nde sâkin sâbıkā İstar Eflak kādısı olan umdetü’l-kuzât İbrahim Efendi b. Süleyman nâm kimesne meclis-i şer‘-i kavîmde mahmiye-i mezbûrede Tercümân Yunus Vakfı’na bi’l-fi‘il mütevellî olan işbu râfi‘u’l-kitâb Süleyman Çelebi b. Ahmed nâm kimesne mahzarında ikrâr-ı tâm ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan merkūm Abdülmüminzâde veresesi mülkleri ve bir tarafdan Na‘lband veresesi mülkleri ve bir tarafdan baʻzan Hasan Efendi veresesi ve baʻzan Eyüb Çelebi mülkleri ve bir tarafdan baʻzan Boğdan sarayı ve baʻzan tarîk-i âm ile mahdûd büyût-ı adîdeyi müştemil mülk menzilimi mütevellî-i mezbûr Süleyman Çelebi’ye beş yüz guruşa bi-tarîkı’l-istiğlâl bey‘ ve teslîm ol dahi mâl-ı vakf-ı mezbûr ile bi’t-tevliye iştirâ ve tesellüm [ve] kabz ve kabûl eylediğinden sonra semeni olan meblağ-ı mezbûr beş yüz guruşu mütevellî-i mezbûr yedinden tamamen ahz u kabz edip yine mütevellî-i mezbûr Süleyman Çelebi menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâb senesi Receb-i şerîfi gurresinden sekiz ay tamamına değin elli guruşa bana îcâr ve teslîm ben dahi ber-vech-i muharrer istîcâr ve tesellüm ve kabûl eyledim dedikde gıbbe’t-tasdîkı’ş-şer‘î mezbûr İbrahim Efendi meclis-i mezkûrda diğer Süleyman Efendi b. Fazlı mahzarında ikrâr ve takrîr-i kelâm edip eğer müddet-i mezbûre tamamında asl-ı mâl-ı mezbûr beş yüz guruş ile menzil-i mezkûrun ücret-i lâzımesi olan elli guruş ki min-haysü’l-mecmû‘ beş yüz elli guruşu mütevellî-i merkūm Süleyman Çelebi’ye edâ edemez isem menzil-i mezbûru ecr-i misli ile âhara bey‘a ve semeninden deyn-i mezkûru edâya ve fazla kalırsa bana îsâle ve bunların mütevakkıf olduğu umûrun küllîsine küllemâ azeltüke fe-ente vekîlî mazmûnu üzere azl ve in‘izâlden masûne <> akd-i rehnde meşrûta vekâlet-i devriye ile tarafımdan mezbûr diğer Süleyman Efendi’yi vekîl ve nâib-i menâb nasb u ta‘yîn eyledim dedikde ol dahi vekâlet-i mezbûreyi kabûl ve kemâ-yenbagī merâsimini edâya ta‘ahhüd etmeğin mâ-vaka‘a bi’t-taleb ketb olundu. Fî 22 min-Cumâdelûlâ sene 1121 Şuhûdü’l-hâl: Umdetü’l-ulemâi’s-sâlihîn eş-Şeyh İsa Efendi, İmâmzâde Mehmed Emin Efendi el-Kâtib, Kādızâde Ahmed Efendi, Monla Mustafa Beşe el-Attâr, Ahmed b. Mehmed, Monla Hasan b. Abdullah, Attâr Ali Çelebi b. Hasan Efendi, Mehmed Efendi b. İsa el-İmâm, Süleyman b. Abdullah ve gayruhum mine’l-huzzâr.