Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 263 Hüküm no: 256 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Abdullah Çelebi’nin talebiyle boşandığı kocası Salih Çelebi b. Mehmed’in ödemesi şartıyla küçük çocuğu Fâtıma’ya nafaka takdir edildiği Mahmiye-i İstanbul’da Sinan Paşa Mahallesi sâkinelerinden olup zâtını ma‘rifet-i şer‘iyye ile ârifân olan Mustafa Efendi b. Yusuf ve Ali Çelebi b. Ahmed ta‘rîfleriyle mu‘arrefe olan Hadice bt. Abdullah Çelebi nâm hatun meclis-i şer‘-i şerîf-i enverde takrîr-i kelâm ve tâʻbir ani’l-merâm edip diyâr-ı âharda olmağla gāib ani’l-meclis Salih Çelebi b. Mehmed nâm kimesne zevcim olup bundan esbak beni tatlîk etmekle mezkûr Salih’in firâşından hâsıla ve benden mütevellide ve bi-hakkı’l-hıdâne hâlâ hacr ve terbiyemde olan işbu sagīre kızım Fâtıma’nın nafaka ve kisve-bahâ ve sâir levâzım-ı zarûriyyesîçün babası gāib-i mezbûr üzerine kıbel-i şer‘den kadr-i ma‘rûf akçe farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi sagīre-i mezkûrenin nafaka ve kisve-bahâ ve sâir levâzım-ı zarûriyyesîçün târih-i kitâbdan beher yevm yedişer akçe farz ve takdîr edip meblağ-ı mefrûz-ı mezkûru sagīre-i mezkûrenin nafaka ve kisvesine ve sâir levâzımına harc u sarfa ve lede’l-iktizâ istidâneye ve inde’z-zafer mezkûr Salih Çelebi üzerine rücû‘a mezkûre Hadice’ye izin verilmeğin mâ-hüve’l-vâki‘ bi’t-taleb ketb olundu. Fî 20 min-Cumâdelûlâ sene 1121 Şuhûdü’l-hâl: Osman Ağa b. Ali, Ömer Çelebi b. Yusuf, Abdullah Çelebi b. Mustafa, Mustafa Efendi b. Yusuf, Ali Çelebi b. Ahmed, Mustafa Çelebi b. Şa‘ban, Ali Çelebi b. İvaz, Hasan Çelebi b. Mustafa, Hüseyin Çelebi b. Hasan ve gayruhum mine’l-huzzâr.