Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 263 Hüküm no: 257 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasil v. Anastaş’ın Nişancı Ca‘fer Çelebi Mahallesi’ndeki sahibi olduğu nısf menzili Bakkal Yanaki v. Panayot’a sattığı Mahmiye-i İstanbul’da Nişancı Ca‘fer Çelebi Mahallesi’nde sâkin Vasil v. Anastaş nâm zimmî mahfil-i kazâda işbu râfi‘u’s-sifr Bakkāl Yanaki v. Panayot nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan hâlâ Çavuşlar Emîni Şeyhî Ağa mülkü ve bir tarafdan Yorgi zimmî mülkü ve bir tarafdan Derzi Anastaş tasarrufunda olan vakıf menzil ve bir tarafdan tarîk-i âm ile mahdûd bir bâb fevkānî ve bir bâb tahtânî oda ve bir mikdâr arsa-yı hâliye ve kenîfi müştemil mülk menzilin mârru’z--zikr Şeyhî Ağa tarafından nısfı ifrâz ve alâmât-ı fâsıla vaz‘ı ile mümtâz olunan nısf hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Bakkāl Yanaki zimmîye yüz kırk guruşa [35b] bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr yüz kırk guruşu mezbûr Bakkāl Yanaki zimmî yedinden tamamen ahz u kabz eyledim baʻde’l-yevm nısf menzil-i mahdûd-ı mezkûr cemî‘ müştemilâtıyla mezbûr Yanaki zimmînin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 min-Cumâdelûlâ sene 1121 Şuhûdü’l-hâl: Mahmud Beşe b. Osman, Derzi Ahmed b. Abdullah, Ali Beşe b. Abdullah, Saka Mehmed b. Veli, el-Hâc Mehmed b. İdris ve gayruhum mine’l-huzzâr.