Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 264 Hüküm no: 258 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Abraham v. Simon’un alacaklısı olduğu Aslan v. Yasef’in borcunu ödemesi Keresteci tâifesinden işbu bâ‘isü’s-sifr Abraham v. Simon nâm zimmî mahfil-i kazâda Aslan v. Yasef nâm zimmî muvâcehesinde üzerine da‘vâ ve takrîr-i kelâm edip mezbûr Aslan zimmetinde cihet-i deyn-i şer‘îden elli guruş hakkım olup hâlâ meblağ-ı mezbûru merkūm Aslan’dan taleb ve da‘vâ eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Aslan cevâbında fi’l-hakīka cihet-i deyn-i şer‘îden meblağ-ı mezbûr elli guruş hâlâ zimmetimde müdde‘î-i mezbûr Abraham’a lâzımü’l-edâ deynimdir deyü bi-tav‘ihi ikrâr u i‘tirâf etmeğin alâ-mûcebi i‘tirâfihî meblağ-ı mezbûr elli guruşu müdde‘î-i merkūm Abraham’a edâ ve teslîme mezbûr Aslan’a tenbîh olunup mâ-vaka‘a bi’t-taleb ketb olundu. Fî 21 min-Cumâdelûlâ sene 1121 Şuhûdü’l-hâl: Mustafa Çelebi b. Şa‘ban, Abdullah b. Mustafa, Hasan Çelebi b. Mustafa, Ali b. İvaz ve gayruhum mine’l-huzzâr.