Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 264 Hüküm no: 259 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mustafa b. Ali’nin bazı eşya ve bir miktar parası kaldığı iddiasıyla İbrahim Beşe b. Mustafa’ya açtığı davada haksız bulunduğu Mahmiye-i İstanbul’da Murad Paşa kurbünde sâkin el-Hâc Mustafa b. Ali nâm kimesne mahfil-i kazâda işbu râfi‘u’l-kitâb İbrahim Beşe b. Mustafa nâm kimesne mahzarında üzerine da‘vâ ve takrîr-i kelâm edip târih-i kitâbdan üç sene mukaddem beynimizde ma‘lûm eşyâ-i ma‘lûmemi bi-tarîkı’l-emâne def‘ ü teslîm ol dahi yedimden baʻde’l-ahz eşyâ-i mezkûremi yine bana redd ü teslîm edip yedinde bir eğer ve bir minder ve iki siyah keçe ve on beş vakıyye kahve ve on guruşum kalmağın taleb eylediğimde bana redd ü teslîmden imtinâ‘ eder suâl olunup aynıları mevcûd ise aynılarını müstehlek ise kıymet-i şer‘iyyelerini bana teslîme tenbîh olunmak matlûbumdur dedikde gıbbe’s-suâl mezbûr İbrahim Beşe cevâbında fi’l-vâki‘ hâl minvâl-i muharrer üzere olup beynimizde ma‘lûm eşyâlar ile ma‘an iddi‘â eylediği eşyâ-i muharrere-i mezbûreyi ve meblağ-ı mezbûr on guruşu kendiye redd ü teslîm eylemişidim deyüp ve husûs-ı mezbûrda merkūm İbrahim Beşe emîn ve yemîni ile tasdîk olunur makūlesinden olmağla müdde‘î-i mezbûr talebiyle mezbûr İbrahim Beşe’ye eşyâ-i muharrere-i mezbûre ile meblağ-ı mezbûr yedinde kalıp üzerine reddi lâzım olduğuna mezbûr İbrahim Beşe’ye yemîn teklîf olundukda ol dahi hasbe’l-mesûl yemîn biʼllâhi’l-aliyyi’l-a‘lâ etmeğin müdde‘î-i mezbûr bî-vech mu‘ârazadan men‘-birle mâ-vaka‘a bi’t-taleb ketb olundu. Fî 23 min-Cumâdelûlâ sene 1121 Şuhûdü’l-hâl: Mehmed Efendi b. Mustafa, Mustafa b. Ali, Ali Çelebi b. İvaz, Mustafa Çelebi b. Şa‘ban, Abdullah b. Abdullah, Süleyman b. Abdullah ve gayruhum mine’l-huzzâr.