Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 265 Hüküm no: 260 Orijinal metin no: [35b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Defterdar Efendi Vakfı’ndan olup harap durumda olan evi kendi malıyla yeniden yaptıran vakfın mütevellî kaymakamı Abdi Çelebi’nin yaptığı harcamaların tespiti Husûs-ı âti’l-beyânın mahallinde keşf ü tahrîr ve takvîmi için bâ-fermân-ı âlî savb-ı şer‘den Mevlânâ İmâmzâde Mehmed Emin Efendi irsâl olunup ol dahi hâssa mi‘mâr halîfelerinden es-Seyyid Mustafa Halîfe b. Eyüb ve Mustafa Halîfe b. Ahmed ile mahmiye-i İstanbul’da Derviş Ali Mahallesi’nde vâki‘ merhûm Defterdâr İbrahim Efendi nâm sâhibü’l-hayrın yine mahalle-i mezbûrede binâ eylediği mescid-i şerîfde imâm olanlara süknâsı meşrûta vakfı olup iki tarafdan vâkıf-ı mezbûrun medresesi ve müezzine meşrûta menzil ve iki tarafdan tarîk-i âm ile mahdûd menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şerîf ettikde vakf-ı mezbûrun kāimmakām-ı mütevellîsi olan Abdi Çelebi meclis-i ma‘kūd-ı mezbûrda takrîr-i kelâm ve tâʻbir-i merâm edip işbu menzil bundan akdem harâb ve mâil-i türâb olup bir vechile kābil-i süknâ olmamağla işbu müşâhede olunan fevkānî iki bâb oda ve tahtânî bir bâb oda ve bir kenîf ve taş duvarı ve sâir mevâzi‘ini taraf-ı şer‘den me’zûnen binâ edip masrûfum ma‘lûm olmak iktizâ etmekle hâlâ keşf ü tahrîr ve takvîm ve mûcebince hüccet-i şer‘iyye i‘tâ olunmak matlûbumdur dedikde mi‘mârân-ı mezbûrân mesâha ve takvîm eylediklerinde tûlen on beş zirâ‘ ve arzen sekiz zirâ‘ kiremidi mevcûd sakfın beher zirâ‘ı otuzar akçeden bin altı yüz akçe ve bi-hesâb-ı mezbûr yetmiş zirâ‘ nîm şişeli sâde tavanın beher zirâ‘ı otuzar akçeden iki bin yüz akçe ve bi-hesâb-ı mezbûr yetmiş zirâ‘ tahta döşemenin beher zirâ‘ı otuzar akçeden iki bin yüz akçe ve bi-hesâb-ı mezbûr seksen altı zirâ‘ iki tarafdan sıvalı dolma duvarın beher zirâ‘ı kırkar akçeden üç bin altı yüz kırk akçe ve iki aded rengâmîz duvar camının her biri yüzer akçeden iki yüz akçe ve çıkrıkçı işi altı aded pencere yüz yirmişer akçeden yedi yüz yirmi akçe ve on sekiz zirâ‘ gülvi? pervâz on beşer akçeden iki yüz yetmiş akçe ve sofada altı zirâ‘ tahta döşeme ma‘a kirişleme beher zirâ‘ı otuzar akçeden yüz seksen akçe ve bir sagīr yüklük iki yüz akçe ve bir zirâ‘ medîne yüz akçe ve çam tahtasından iki aded kapı üç yüz ve taş duvarlarda yüz yirmi zirâ‘ beyaz sıvanın beher zirâ‘ı sekizer akçeden dokuz yüz altmış akçe ve bir ocak ma‘a depe altı yüz akçe ve on zirâ‘ kanadları müsta‘mel masandıra ve dolap ve iki kat tahta döşeme beher zirâ‘ı kırkar akçeden dört yüz akçe ve on zirâ‘ çam tahtasından nîm şişeli perdenin beher zirâ‘ı yirmi beşer akçeden iki yüz akçe ve dokuz aded cam depe ma‘a hâne? beheri dokuzar akçeden doksan akçe ve on iki zirâ‘ çam tahtasından nîm şişeli bacanın beher zirâ‘ı yirmişer akçeden iki yüz kırk akçe ve on iki zirâ‘ tahta raf beher zirâ‘ı onar akçeden yüz yirmi akçe ve kapı üzerinde iki zirâ‘ tahta döşeme altmış akçe ve iki bölme dolap yüz altmış akçe ve tahtânîde meşe tahtasından bir kapı iki yüz akçe ve yine tahtânîde çam tahtasından Firengî kilidli bir kapı yüz elli akçe ve taşı mevcûd on zirâ‘ duvarın beher zirâ‘ı yirmişer akçeden iki yüz akçe ve bir sagīr kapı yüz akçe ve iki aded mahlût pencere altmışar akçeden yüz yirmi akçe ve def‘a taşı mevcûd on altı zirâ‘ duvarın beher zirâ‘ı yirmişer akçeden üç yüz yirmi akçe ve cedîd kireç ve horasan sıvalı yirmi dört zirâ‘ kerpiç duvarın beher zirâ‘ı otuzar akçeden yedi yüz yirmi akçe ve kenîfde altı zirâ‘ sundurma kırkar akçeden iki yüz kırk akçe ve etrâfında on zirâ‘ tahta perde yirmişer akçeden iki yüz akçe ve beş zirâ‘ tahta döşeme ma‘a kirişleme otuzar akçeden yüz elli akçe ve duvar üzerinde yirmi dört zirâ‘ sakf ma‘a kiremid yirmişer akçeden dört yüz seksen akçe ve yirmi dört zirâ‘ mahlût tahta basgı beher zirâ‘ı onar akçeden iki yüz kırk akçe ve duvar üzerinde on altı zirâ‘ tahtadan kalkan perde yirmişer akçeden üç yüz yirmi akçe ve yine medrese tarafında on altı zirâ‘ mahlût tahta basgı onar akçeden yüz altmış akçe ve tathîr-i kâriz ber-vech-i tahmîn üç yüz akçe ve sokak kapısı meremmeti altmış akçe ve kırk beş zirâ‘ cedîd kaldırım on ikişer akçeden beş yüz kırk akçe ve ihrâc-ı mezbele için ücret-i ırgādiyye üç yüz elli akçe ki min-haysü’l-mecmû‘ mütevellî-i mezbûrun masrûfu ancak on dokuz bin yüz doksan akçe olup bundan ziyâde ve noksana tahammülü yokdur deyü mi‘mârân-ı mezbûrân ve Müslimîn-i mezbûrîn icmâ‘ u ittifâk eylediklerini mevlânâ-yı mezbûr mahallinde ketb ü tahrîr ba‘dehû ma‘an irsâl olunan Çukadâr el-Hâc Mehmed b. Hüseyin ve Muhzır Hüseyin b. Hasan ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 18 min-Cumâdelûlâ sene 1121 Şuhûdü’l-hâl: Mehmed Efendi b. Abdurrahman, Abdurrahman Efendi b. Abdullah Efendi, Ali Ağa b. el-Hâc Mustafa, İbrahim Efendi b. Resul, Yusuf Efendi b. Abdurrahman, Osman Efendi b. Mehmed, diğer Osman Efendi b. Abdullah, Molla Hüseyin b. Hâfız Mehmed, Mustafa Efendi b. Ahmed ve gayruhum mine’l-huzzâr.