Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 267 Hüküm no: 261 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Odabaşı b. Hüseyin’in vârislerinden İsmihan Hatun bt. Hacı Mehmed’in terekedeki hissesi bedelini sulh yoluyla kız kardeşi Afife’den teslim aldığı Mahmiye-i İstanbul’da Avcı Bey Mahallesi sükkânından iken bundan akdem vefât eden Hasan Odabaşı b. Hüseyin’in verâseti li-üm kız karındaşları Afife ve İsmihan ibnetey el-Hâc Mehmed’e münhasıra ve terekesinin nısfı mezkûre Afife’ye ve nısf-ı âharı merkūme İsmihan’a isâbet ve intikāl eylediği şer‘an zâhir ve mütebeyyin oldukdan sonra zât-ı mezkûreyi ma‘rifet-i şer‘iyye ile ârifân Halil Çelebi b. Mustafa ve Abdullah Çelebi b. Ali ta‘rîfleriyle mu‘arrefe olan mezkûre Afife meclis-i şer‘-i şerîf-i enver ve mahfil-i dîn-i münîf-i ezherde mezkûre İsmihan’ın zevci ve tarafından husûs-ı âti’l-beyânı tasdîka vekîl olduğu zât-ı mezkûreyi ma‘rifet-i şer‘iyye ile ârifân Ebûbekir Çelebi b. İbrahim ve Mehmed Çelebi b. Mustafa şehâdetleriyle şer‘an sâbit olan Hızır Beşe b. Mehmed nâm kimesne mahzarında ikrâr-ı tâm ve takrîr-i kelâm edip mûrisimiz mezkûr Hasan Odabaşı karındaşım müvekkile-i mezkûrenin menzilinde fevt olup nakd yedi yüz elli guruş ile sâir menkūl ve evânî-i nuhâsiye ve gayr-ı nuhâsiye ve mefrûşât ve melbûsât ve bi’l-cümle ism-i mâl ıtlâk olunur terekesini müvekkile-i mezkûre kabz etmekle ber-vech-i meşrûh nısf hisse-i irsiyyemi müvekkile-i mezkûre İsmihan’dan taleb ve da‘vâ eylediğimde ol dahi inkâr etmeğin beynimizde nizâ‘-ı küllî cereyânından sonra beynimize muslihûn tavassut edip da‘vâ-yı mezkûremden beni karındaşım müvekkile-i mezkûre ile iki yüz guruş üzerine sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezkûr iki yüz guruşu işbu meclis-i şer‘de vekîl-i mezkûr yedinden bi’t-tamam ve’l-kemâl ahz u kabz edip baʻde’l-yevm tereke-i mezkûra müte‘allika âmme-i de‘âvî ve kâffe-i mutâlebâtdan ve hukūk-ı ma‘lûme ve mechûleden müvekkile-i mezkûre İsmihan Hatun’un zimmetini ibrâ-i âmm-ı râfi‘u’l-hısâm ile ibrâ ve iskāt eyledim fîmâ-ba‘d husûs-ı mezkûra müte‘allika müvekkile-i mezkûre ile aslâ ve kat‘â da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 23 min-Cumâdelûlâ sene 1121 Şuhûdü’l-hâl: İmâm Ahmed Efendi b. Hasan Efendi, İmâm Mehmed Efendi b. Ahmed Efendi, Mehmed Çavuş b. Abdullah, Müezzin İbrahim Çelebi b. Şa‘ban, Abdullah Efendi Hekîmzâde, Odabaşı Mustafa Ağa, Berber Ahmed Çelebi, Küçük Mehmed Beşe, Hamza Çelebi b. Bekir, Mestçi Mustafa, Mehmed Çelebi b. Mustafa, İsmail Çelebi b. Mustafa, Abdullah Efendi, Bekir Çavuş b. Ya‘kub, İbrahim Çelebi b. İsmail, Camcı Mustafa Beşe b. Mehmed ve gayruhum mine’l-huzzâr.