Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 268 Hüküm no: 262 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahim Çelebi b. İbrahim’in evini Anadolu kazaskeri tezkirecisi Abdülfettâh Efendi b. Halil’e sattığı Mahmiye-i İstanbul’da Debbâğzâde Hasan Çelebi Mahallesi’nde sâkin Abdurrahim Çelebi b. İbrahim nâm kimesne meclis-i şer‘-i şerîf-i enverde hâlâ Anadolu kazaskeri hazretlerinin tezkireciliği hizmeti ile şeref-yâb olan umdetü’l-müderrisîni’l-kirâm zahru’l-ulemâi’l-fihâm işbu kitâb-ı sıhhat-nisâbın hâfızı Abdülfettâh Efendi b. Halil mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede Hoca Hayreddin Mahallesi’nde vâki‘ bir tarafdan Şeyhzâde Efendi odaları ve bir tarafdan Avarezâde hemşîresi menzili ve bir tarafdan tarîk-i hâs ve bir tarafdan tarîk-i âm ile mahdûd dâhiliyede fevkānî iki bâb oda ve tahtânî iki bâb oda ve bir matbah ve bir hamam ve bir câmekân ve hâriciyede fevkānî üç bâb oda ve bir sofa ve tahtında ahır ve kenîf ve musluk ve havluyu müştemil menzilimi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mûmâ-ileyh Abdülfettâh Efendi’ye bin elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr bin elli guruşu mûmâ-ileyh Abdülfettâh Efendi yedinden tamamen ahz u kabz eyledim baʻde’l-yevm menzil-i mahdûd-ı mezkûr cemî‘ müştemilâtıyla mûmâ-ileyh Abdülfettâh Efendi’nin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-Cumâdelûlâ sene 1121 Şuhûdü’l-hâl: Fahrü’l-eşbâh Kethüdâ Ahmed Efendi b. Abdüllatif, Fahrü’l-akrân Hazinedâr Süleyman Çelebi b. Ahmed Ağa, Berber el-Hâc Osman b. Mustafa, Berber Süleyman Çelebi b. Mustafa, Turşucu Hasan Beşe b. Hüseyin, İbrahim Beşe b. Mustafa, İbrahim Beşe b. Mustafa, Ömer Beşe b. el-Hâc Ebûbekir, es-Seyyid Mustafa Efendi b. Abdülkerim el-Kâtib, Mehmed Efendi b. Yusuf el-Kâtib ve gayruhum mine’l-huzzâr.