Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 268 Hüküm no: 263 Orijinal metin no: [36a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlya v. Pavlo v. Gülyar Tarabya’daki evini, kayıkhanesini ve bağını vakfettiği Mâ fîhi min-asli’l-vakfi ve’ş-şürûti cerâ indî ale’n-nemati’l-mebsût fe-hakemtü bi-sıhhatihî ve lüzûmihi bi-husûsihî ve umûmihî âlimen bi’l-hilâfi’l-cârî beyne’l-eimmeti’l-eşrâfi’l-İslâm nemekahü’l-fakīr Ebû İshak İsmail b. İbrahim el-Kādı bi-Dârü’s-saltanatü’l-aliyye Kostantıniyyeti’l-mahmiye humiyet ani’l-âfâti ve’l-beliyye ufiye anhümâ ve gufira lehümâ bi ma‘rifeti’l-hafiyye ve’l-celiyye Mahmiye-i İstanbul’da Ayakapısı dâhilinde vâki‘ ( ) Mahallesi’nde sâkin İlya v. Pavlo v. Gülyar nâm zimmî meclis-i şer‘-i şerîf-i lâzımü’t-teşrîfde zikri âtî vakfına mütevellî nasb u ta‘yîn eylediği Mustafa Çelebi b. el-Hâc Mahmud mahzarında ikrâr ve takrîr-i kelâm edip yedimde mülk ve hakkım olup mahrûse-i Galata nevâhîsinden İstinye nâhiyesine tâbi‘ Tarabya nâm karyede vâki‘ bir tarafdan Aci Yamandi mülkü ve bir tarafdan Papa Yakomi mülkü ve bir tarafdan sâhil-i bahr ve bir tarafdan tarîk-i âm ile mahdûd iki bâb fevkānî oda ve tahtında bir ahır ve bir matbah ve bir fırın ve bir bi’r-i mâ ve kenîf ve havluyu müştemil menzil ile yine menzil-i mezbûrun hizâsında ve sâhil-i bahrda vâki‘ ma‘lûmü’l-hudûd ve’l-müştemilât kayık limanı ve liman-ı mezbûra muttasıl üç bâb kayıkhânemi ve yine karye-i mezbûre bağları hilâlinde vâki‘ bir tarafdan Panayot zimmî bağı ve bir tarafdan Duka zimmî bağı ve bir tarafdan tarîk-i âm ile mahdûd olup içinde mâ-i cârîyi müştemil kürûmî mülk bağımı bi-cümleti’t-tevâbi‘ ve’l-levâhık vakf-ı sahîh-i müebbed ve habs-i sarîh-i muhalled ile vakf ve habsedip şöyle şart eyledim ki zikr olunan menzil ve liman ve kayıkhâne ve bağa hayatda olduğumca ben mutasarrıf olup helâkimden sonra zikr olunan menzil ve liman ve kayıkhâne ve bağ hasbe-mâ cerati’l-âde icâre-i misliyye ile îcâr olunup hâsıl olan gallesinden vilâyet-i Anadolu’da Eğin kazâsında vâki‘ Şırzı nâm karyede Büyükçeşme demekle ma‘rûf el-Hâc Osman Çeşmesi’nin mesârifine [36b] sarf olunmak için beher sene üçer yüz altmışar akçe verilip mâ‘adâ gallesine evlâdım ve evlâd-ı evlâdım ve evlâd-ı evlâd-ı evlâdım batnen ba‘de batnin mutasarrıf olup evlâdım münkarız oldukda mevcûdda olan akrabâm husûs-ı mîrâsımda istihkāklarına göre mutasarrıf olalar ve ba‘de inkırâzi’l-küll zikr olunan çeşme mesârifine verilen beher sene üç yüz altmış akçeden fazla galle-i vakf-ı mezbûr karye-i merkūmenin gerek Müslim ve gerek zimmî ahâlîsinin hâne-i avârızlarına verilip ve vakf-ı mezbûrun hasbî tevliyeti işbu mezbûr Mustafa Çelebi’ye meşrûta olup vefâtından sonra evlâdına ve evlâd-ı evlâdına ve evlâd-ı evlâd-ı evlâdına meşrûta olup evlâdı bulunmaz ise akreb akrabâsı mütevellî olup hıyânetleri zuhûr eder ise re’y-i hâkimü’ş-şer‘le bir müstakīm kimesne mütevellî nasb oluna ve mürûr-ı eyyâm ile vakf-ı mezbûra ve şürût ve kuyûduma ri‘âyet müte‘azzire olur ise vakf-ı mezbûr mutlakā vakf-ı fukarâ ola deyü ta‘yîn-i şürût ve tebyîn-i kuyûd edip zikr olunan menzil ve liman ve kayıkhâne ve bağı fâriğân ani’ş-şevâgil mütevellî-i mezbûra teslîm ol dahi vakfiyet üzere kabz ve tesellüm eyledi dedikde gıbbe’t-tasdîkı’ş-şer‘î vâkıf-ı mezbûr mütevellî-i merkūm ile da‘vâ-yı rücû‘ ve istirdâd edip sadr-ı kitâbî tevkī‘-i müstetâbî ile muvakki‘ olan hâkim-i hâsim-i celîlü’ş-şân hazretleri huzûrunda terâfu‘ eylediklerinde hâkim-i merkūm veffaka’l-meliki’l-kayyûm hazretleri dahi vakf-ı akārda inde’l-eimmeti’l-eslâf vâkiʻ olan hilâf ve ihtilâfa âlim olmağın alâ-kavli men yerâhü fi’l-eimmeti’l-müctehidîn vakf-ı mezbûrun ve zımnında olan şürût ve kuyûdun sıhhat ve lüzûmuna hükmetmeğin mâ-vaka‘a bi’t-taleb ketb olundu. Fî 25 min-şehri Rebî‘ülevvel sene 1121 Şuhûdü’l-hâl: İbrahim Çelebi b. Mehmed, Hüseyin Bey b. Osman, Osman Beşe b. Hasan, Mustafa b. Süleyman, Mehmed Çelebi b. Mustafa, Abdi Bey b. el-Hâc Mahmud ve gayruhum mine’l-huzzâr.