Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 270 Hüküm no: 264 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taha Çelebi b. Hacı Ali’nin eşyasını ve hayvanlarını sattığı firarî Melkon v. Bağdasar v. Minas’a olan borcunu Melkon’un kayyumu Molla Mehmed b. Hacı Ömer’in ödemesi Mahmiye-i İstanbul’da Küçükpazar’da Somuncu fırınında ekmekçi iken bundan akdem firâr ve gaybet-i münkatı‘a ile gāib olan Melkon v. Bağdasar v. Minas nâm zimmînin emvâl ve eşyâsını hıfz için kıbel-i şer‘den bâ-hüccet-i şer‘iyye kayyûm nasb olunan işbu râfi‘u’l-kitâb Molla Mehmed b. el-Hâc Ömer nâm kimesne mahfil-i kazâda Taha Çelebi b. el-Hâc Ali nâm kimesne mahzarında üzerine da‘vâ ve takrîr-i kelâm edip mezbûr Taha Çelebi’ye işbu hâzır bi’l-meclis es-Seyyid Mustafa b. Ebûbekir nâm kimesne ben gāib-i mezbûrun vekîliyim deyü fuzûlen üç re’s bârgir ve dört yüz yetmiş üç keyl buğdayını kıymet-i misilleri olan on dört bin yetmiş beş akçeye bey‘ ve teslîm eylediğinde ol dahi baʻde’l-iştirâ mârru’z--zikr bârgirler ve buğdayı kendi mesârifine sarfla istihlâk edip gāib-i mezbûrun on dört bin yetmiş beş akçesi mezbûr Taha Çelebi yedinde kalmağla hâlâ meblağ-ı mezbûru merkūm Taha Çelebi’den taleb ederim suâl olunup gāib-i mezbûr için bana teslîme tenbîh olunmak matlûbumdur dedikde gıbbe’s-suâl mezbûr Taha Çelebi cevâbında hâl bâlâda tafsîl ve şerh olunduğu üzere olup eşyâ-i muharrere-i mezbûre semenlerinden gāib-i mezbûra zimmetinde on dört bin yetmiş beş akçe deyni olduğunu ikrâr u i‘tirâf etmeğin alâ-mûcibi i‘tirâfihî meblağ-ı mezbûr on dört bin yetmiş beş akçeyi gāib-i mezbûr için kayyım-ı mezbûr Molla Mehmed’e edâ ve teslîme mezbûr Taha Çelebi’ye tenbîh-birle mâ-vaka‘a bi’t-taleb ketb olundu. Fî 14 min-Cumâdelûlâ sene 1121 Şuhûdü’l-hâl: Ahmed Yazıcı b. Ali, el-Hâc Süleyman b. el-Hâc Ömer, el-Hâc Ahmed b. el-Hâc Şa‘ban, Mehmed Beşe b. Hüseyin ve gayruhum mine’l-huzzâr.