Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 271 Hüküm no: 266 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Yani’nin Bayezid Ağa Mahallesi’ndeki evini Papa Hristodolo v. Haros Bezyan’a sattığı Mahmiye-i İstanbul’da Topkapısı dâhilinde vâki‘ Bayezid Ağa Mahallesi sükkânından Nikola v. Yani nâm zimmî meclis-i şer‘-i şerîf-i enverde işbu râfi‘u’s-sifr Papa Hristodolo v. Haros Bezyan nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Devecioğlu Kalon nâm zimmî mülkü ve iki tarafdan Baltacı odaları ve bir tarafdan tarîk-i âm ile mahdûd iki bâb fevkānî oda ve bir sofa ve bir şehnişîni ve tahtânî bir kenîf ve bir dip asmayı müştemil mülk menzilimi cümle tevâbi‘ ve levâhıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Papa Hristodolo’ya yüz seksen guruşa bey‘ ve temlîk ve teslîm ol dahi vech-i muharrer üzere iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz seksen guruşu merkūm Papa Hristodolo yedinden tamamen ahz u kabz eyledim baʻde’l-yevm menzil-i mahdûd-ı mezbûrda alâka ve medhalim kalmayıp merkūm Papa Hristodolo’nun mülk ve hakkı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’l-mer‘î mâ-hüve’l-vâki‘ bi’t-taleb ketb olundu. Fî 14 min-Cumâdelûlâ sene 1121 Şuhûdü’l-hâl: Ahmed Efendi b. Mustafa el-İmâm, Receb b. Süleyman, Mehmed Beşe b. Ali, Mehmed b. Ahmed, Ali Beşe b. Ahmed, Mehmed b. Ahmed, Monla Mustafa b. Ahmed ve gayruhum mine’l-huzzâr. Todori v. Harperso, Hristodoli v. Londari, Hristo v. Toli?, Kostantin v. Şiro, Duka v. Hırsafi, Dahsani? v. Todori, Aleksan v. İstemat, Duka v. Sahar, Petro v. Kosta, Nikola v. Yani.