Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 272 Hüküm no: 267 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. İvaz’ın talebiyle boşandığı kocası Mehmed Beşe b. Ahmed’in ödemesi şartıyla küçük kızları Emetullah’ın ihtiyaçları için nafaka takdir edildiği Mahmiye-i İstanbul’da Aydın Kethüdâ Mahallesi’nde sâkine zâtı ta‘rîf-i şer‘î ile mu‘arrefe olan işbu râfi‘atü’l-kitâb Sâliha bt. İvaz nâm hatun mahfil-i kazâda zevc-i sâbıkı Mehmed Beşe b. Ahmed nâm kimesne mahzarında takrîr-i kelâm ve tâʻbir ani’l-merâm edip zevcim mezbûr Mehmed Beşe’nin firâşından hâsıla ve benden mütevellide bi-hakkı’l-hıdâne hacr ve terbiyemde olan işbu sadriye sagīre kızım Emetullah’ın nafaka ve kisveye ihtiyâcı olmağla kıbel-i şer‘den babası mezbûr üzerine kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri târih-i kitâbdan sagīre-i mezbûrenin nafaka ve kisve-bahâsıʼçün babası mezbûr üzerine küllü yevm dörder akçe farz ve takdîr edip meblağ-ı mefrûz-ı mezbûru sagīre-i mezbûrenin nafaka ve kisvesine harc u sarfa ve lede’l-iktizâ istidâneye ve inde’z-zafer babası mezbûr üzerine rücû‘a mezbûre Sâliha’ya izin vermeğin mâ-vaka‘a bi’t-taleb ketb olundu. Fî 25 min-Cumâdelûlâ sene 1121 Şuhûdü’l-hâl: Ömer b. Ahmed, Hasan b. Mustafa, Ali b. İvaz, Ali b. Bâli, Süleyman b. Abdullah ve gayruhum mine’l-huzzâr.