Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 272 Hüküm no: 268 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanîfe bt. Abdullah’ın geçinemediği kocası Mehmed Beşe b. Ahmed Çelebi’den boşandığı Mahmiye-i İstanbul’da Gül Câmi‘-i şerîfi kurbünde vâki‘ Çavuş Mescidi Mahallesi sâkinelerinden olup zâtı ma‘rifet-i şer‘iyye ile ârifân Ömer Çelebi b. Yusuf ve Mehmed Çelebi b. Abdülkerim ve Mehmed Çelebi b. Hüseyin ta‘rîfleriyle mu‘arrefe olan Hanîfe bt. Abdullah nâm hatun meclis-i şer‘-i şerîf-i enverde zevc-i dâhili işbu hâfızü’r-rakīm Mehmed Beşe b. Ahmed Çelebi mahzarında bi-tav‘ihâ ikrâr ve takrîr-i kelâm edip mezbûr Mehmed Beşe zevcim olup beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan altı bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mehmed Beşe ile muhâla‘a-i sahîha-i şer‘iyye ile muhâla‘a olduğumda ol dahi vech-i meşrûh üzere hul‘-ı mezkûru kabûl ettiğinden sonra hukūk-ı zevciyete müte‘allika olan âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 25 min-Cumâdelûlâ sene 1121 Şuhûdü’l-hâl: Ömer Çelebi b. Yusuf, Ahmed Çelebi b. İbrahim, Mustafa Çelebi b. Şa‘ban, Ömer Çelebi b. Ahmed, Mehmed Çelebi b. Abdülkerim, Mehmed Çelebi b. Hüseyin Hasan Çelebi b. Mustafa ve gayruhum mine’l-huzzâr.