Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 273 Hüküm no: 269 Orijinal metin no: [37a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Horos v. Bezyani v. Nikola’dan intikal eden Bayezid Ağa Mahallesi’ndeki evi vârislerinin Nikola v. Yani’ye sattıkları Mahmiye-i İstanbul’da Topkapısı kurbünde Bayezid Ağa Mahallesi’nde sâkin iken bundan akdem hâlik olan Horos v. Bezyan v. Nikola nâm zimmînin verâseti zevce-i metrûke[si] Angeli bt. Sava nâm Nasrâniye ile sulbî oğlu Papa Hristo ve sulbiye kebîre kızı Beluhron’a münhasıra olduğu şer‘an zâhir ve mütehakkık oldukdan sonra mezbûr Papa Hristo ile zâtları ta‘rîf-i şer‘î ile mu‘arrefe olan mezbûretân Angeli ve Beluhron mahfil-i kazâda işbu râfi‘u’s-sifr Nikola v. Yani nâm zimmî muvâcehesinde her biri ikrâr ve takrîr-i kelâm edip akd-i âti’z-zikrin sudûruna değin mûrisimiz hâlik-i mezbûrdan müntakil yedimizde mülk ve hakkımız olup mahalle-i mezbûrede vâki‘ bir tarafdan Devecioğlu mülkü ve bir tarafdan Nazlı nâm Nasrâniye mülkü ve bir tarafdan tarîk-i âm ve bir tarafdan tarîk-i hâs ile mahdûd fevkānî iki bâb oda ve bir dehlîz ve tahtânî bir bâb oda ve bir kenîf ve bir mikdâr havluyu müştemil mülk menzilimizi tarafeynden îcâb ve kabûlü [hâvî] şürût-ı müfsideden ârî bey‘-i bâtt-ı sahîh-i şer‘î ile mezbûr Nikola’ya iki yüz otuz guruşa bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr iki yüz otuz guruşu mezbûr Nikola yedinden tamamen ahz u kabz eyledik baʻde’l-yevm menzil-i mahdûd-ı mezkûr cemî‘ müştemilâtıyla mezbûr Nikola’nın mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Cumâdelûlâ li-sene ihdâ ve işrîn ve miʼete ve elf. Şuhûdü’l-hâl: İmâm Ahmed Efendi [b.] Mustafa, Mehmed Çelebi b. Ali, Mehmed Çelebi b. Ahmed, Ali Beşe b. Ahmed, Mehmed Çelebi b. Ahmed, Monla Mustafa b. Ahmed ve gayruhum mine’l-huzzâr.