Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 273 Hüküm no: 270 Orijinal metin no: [37a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Baba Ali Şâh-ı Zengî Zaviyesi zaviyedarlığını haksız yere ele geçiren Şeyh İsmail’in yerine bir önceki zaviyedar Şeyh Hasan Efendi b. Ahmed’e zaviyedarlığın tevcih edildiği Ashâb-ı hayrâtdan merhûm Baba Ali Şâh-ı Zengî Zâviyesi’nde zâviyedâr olan işbu râfi‘u’l-kitâb eş-Şeyh Hasan Efendi b. Ahmed meclis-i şerîf-i enverde takrîr-i kelâm ve tâʻbir ani’l-merâm edip merhûm-ı mezbûrun mahmiye-i İstanbul’da Mahmudpaşa kurbünde vâki‘ bir tarafdan Bâzirgân Hayreddin mülkü olan <> ve bir tarafdan <> tarîk-i hâs ve iki tarafdan tarîk-i âm ile mahdûd zâviyeye kendi mâlım ile nefsimiʼçün mülküm olmak üzere iki bâb dükkân ve iki oda binâ edip berât-ı şerîf-i âlî-şân ile zâviye-i mezbûreye zâviyedâr iken hacc-ı şerîfe âzim olduğumdan sonra tarîk-i hacc-ı şerîfde vefât etti deyü işbu hâzır bi’l-meclis eş-Şeyh İsmail nâm kimesne zâviye-i mezbûreyi hilâf-ı inhâ üzerimden alıp berât ettirmekle ahvâlimi der-i devlet-medâra arzuhâl eylediğimde İstanbul kādısı fazîletlü efendi şer‘le tefahhus ve i‘lâm eyleyesiz deyü fermân-ı âlî sâdır olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri dahi vukūfu olan on beş nefer bî-garaz Müslimînden istihbâr ve haberlerini tahrîr ve hasmım dahi i‘tirâf eylediğini i‘lâm eyledikde mezbûr eş-Şeyh İsmail ref‘inden yedime tuğra-yı garrâ-yı cihân-mutâ‘ ile muhallâ berât-ı şerîf-i âlî-şân sadaka ve ihsân olunmağla kıbel-i şer‘den dahi hüccet-i şer‘iyye olunmak matlûbumdur deyü bir kıt‘a berât-ı şerîf-i âlî-şân ibrâz edip nazar olundukda hâl bi’l-cümle bâlâda mezbûr eş-Şeyh el-Hâc Hasan Efendi’nin takrîr-i meşrûhu [üzere] olduğu zâhir ve nümâyân olmağın kıbel-i şer‘den işbu hüccet tahrîr olunup mezbûr eş-Şeyh el-Hâc Hasan Efendi yedine def‘ ve i‘tâ olundu. Fî 25 min-Cumâdelûlâ sene 1121 Şuhûdü’l-hâl: Müezzin Halil Efendi b. Mustafa, Ahmed Efendi b. Mustafa, el-Hâc Musa b. Hasan, el-Hâc Halil b. Veliyüddin, Hüseyin Beşe b. Hasan, Ahmed b. Hacı Hüseyin, Süleyman b. Mustafa, Hamza b. Hasan, el-Hâc Hüseyin Ağa b. Muslu, Ali Efendi b. Halil, Ahmed Çelebi b. Mehmed, Veli Efendi b. Mehmed, Mustafa b. ( ) ve gayruhum mine’l-huzzâr.