Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 274 Hüküm no: 271 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Onikidivan’ın Kuzgün köyünden Hacı Salih b. Ali’nin haksız yere parasını alan Hazinedar Yusuf Çelebi b. Abdullah’dan sulh yoluyla parasını geri aldığı Vilâyet-i Anadolu’da Onikidivan kazâsına tâbi‘ Kuzgün nâm karyeden el-Hâc Salih b. Ali nâm kimesne mahfil-i kazâda işbu râfi‘u’l-vesîka Hazînedâr Yusuf Çelebi b. Abdullah nâm kimesne mahzarında ikrâr ve takrîr-i kelâm edip mezbûr Yusuf Çelebi bundan akdem Bolu voyvodası Ömer Ağa’nın hazînedârı iken senin emrin[le] tasarruf olunmuş deyü benim bi-gayr-ı hakkın altmış iki buçuk guruşumu ahz u kabz etmekle meblağ-ı mezbûru mezkûr Yusuf Çelebi’den taleb ve da‘vâ ettiğimde ol dahi inkâr etmekle beynimizde nizâ‘-ı küllî vukū‘undan sonra muslihûn tavassut edip da‘vâ-yı mezkûremden mezkûr Yusuf Çelebi benim ile yirmi altı guruşa sulh oldukda ben dahi sulh-ı mezkûru kabûl ve bedel-i sulh olan meblağ-ı mezkûr yirmi altı guruşu mezbûr Yusuf Çelebi’den ahz u kabz ettiğimden sonra husûs-ı mezbûra müte‘allik âmme-i da‘vâdan mezbûr Yusuf Çelebi’nin zimmetini ibrâ-i âmm-ı kātı‘u’n-nizâ‘la ibrâ ve iskāt eyledim dedikde gıbbe’t-tasdîkı’l-mer‘î Ömer Efendi b. Osman nâm kimesne meclis-i şer‘de ikrâr ve takrîr-i kelâm edip eğer mezbûr Yusuf Çelebi kıbelinden mezkûr el-Hâc Salih’in ehl ü evlâdına zarâr terettüb eder ise ben kefîl ve dâminim dedikde mâ-vaka‘a bi’t-taleb ketb olundu. Fî 17 min-Cumâdelûlâ sene 1121 Şuhûdü’l-hâl: Ömer Efendi b. Osman Efendi, Seyfi Çelebi b. Abdullah, Molla Ali Çelebi, Murad Çelebi ve gayruhum mine’l-huzzâr.