Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 275 Hüküm no: 272 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hanım bt. Mirâhor Ali Ağa’nın evine yaptırdığı tuvalet nedeni ile komşusu Hacı Salih b. Mehmed ile olan davasında sulh oldukları Husûs-ı âti’l-beyânın mahallinde keşf ü tahrîri için sâdır olan fermân-ı şerîfe imtisâlen savb-ı şer‘den Mevlânâ İmâmzâde Mehmed Emin Efendi irsâl olunup ol dahi hâssa mi‘mâr halîfelerinden Hasan Halîfe b. Mahmud ile mahmiye-i İstanbul’da Seferikoz Mahallesi’nde vâki‘ ve yine Seferikoz Vakfı’ndan Fâtıma Hanım bt. Mirâhor Ali Ağa’nın tasarrufunda olan menzile varıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i nebevî ettikde mûmâ-ileyhâ Fâtıma Hanım’ın oğlu ve tarafından husûs-ı âti’z-zikre vekîl olduğu Mehmed Ağa b. Ali ve Hasan Bey b. Hüseyin şehâdetleriyle şer‘an sâbit olan fahrü’l-emâsil ve’l-ekârim Hasan Bey b. Ali Paşa meclis-i ma‘kūd-ı mezkûrda vakf-ı mezbûrun bi’l-fi‘il mütevellîsi olan es-Seyyid Mustafa Efendi b. el-Hâc Hüseyin hâzır olduğu hâlde câr-ı mülâsıkı el-Hâc Salih b. Mehmed mahzarında bi’l-vekâle ikrâr ve takrîr-i kelâm edip merkūm el-Hâc Salih’in menzili ve müvekkilem mûmâ-ileyhânın işbu hâlâ binâ eylediği menzili mârru’z--zikr Seferikoz Vakfı’ndan olup müvekkilem mûmâ-ileyhâ işbu menzilin arsa-yı hâliyesi üzerine işbu müşâhede olunan ebniyeyi kendi mâlı ve izn-i mütevellî ile mu‘accelesine mahsûb olmak üzere ihdâs ve fevkānî işbu kenîfi merkūm el-Hâc Salih’in fevkānî odasına muttasıl pencerelerinin önüne binâ edip merkūm el-Hâc Salih dahi zikr olunan kenîfin benim menzilime zararı vardır deyü da‘vâ etmekle beynimizde nizâ‘ vâki‘ olmuşidi. Hâlâ ben zikr olunan kenîfin döşemesini mahallinden mi‘mâr-ı mezbûr mesâhası üzere bir zirâ‘ aşağı indirip ve künklerin yukarı tarafına bir nizek vaz‘ edip ber-vech-i muharrer isti‘mâl ve tasarruf etmek üzere bi’l-vekâle ta‘ahhüd edip ve işbu menzilin ebniye-i mezbûresi hâdis ve merkūm el-Hâc Salih’in tasarrufunda olan menzilin ebniyesi kadîm olmağla saçağına kendi mâlım ile oluk vaz‘ etmeğin merkūm el-Hâc Salih dahi zikr olunan oluğa müdâhale ve nizâ‘ etmemek üzere müte‘ahhid olup ve mütevellî-i mezbûr dahi bu minvâl üzere re’y etmeğin ber-vech-i muharrer beynimizi tevfîk ve kat‘-ı nizâ‘ eyledik dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Hüseyin b. Oruc ve Abdullah b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 19 min-Cumâdelûlâ sene 1121 Şuhûdü’l-hâl: Hasan Halîfe b. Mahmud, Mehmed Efendi b. Mehmed, Mehmed Ağa b. Ali, Ali Çelebi b. Mehmed, Müezzin Mehmed Çelebi b. Ahmed, İmâm Mustafa Efendi, Hacı Mustafa Efendi b. İsa, Süleyman Çelebi b. Mehmed ve gayruhum mine’l-huzzâr.