Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 276 Hüküm no: 273 Orijinal metin no: [37b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mustafa’nın geçinemediği kocası Mehmed Çelebi b. Hacı Ahmed’den boşandığı Mahmiye-i İstanbul’da Âşıkpaşa Mahallesi sâkinelerinden olup zâtı Müezzin İbrahim Efendi b. Mahmud ve el-Hâc Hüseyin b. Ahmed ta‘rîfleriyle mu‘arrefe olan Hadice bt. Mustafa nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb Mehmed Çelebi b. el-Hâc Ahmed nâm kimesne mahzarında bi-tav‘ihâ ikrâr-ı tâm ve takrîr-i kelâm edip mezbûr Mehmed Çelebi zevcim olup beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan beş bin akçe mehr-i müeccelim ve mezbûr Mehmed Çelebi’nin firâşından hamlim olmağla vaz‘-ı haml edinceye değin nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mehmed Çelebi ile muhâla‘a-i sahîha-i şer‘iyye ile muhâla‘a olduğumda ol dahi vech-i meşrûh üzere hul‘-ı mezkûru kabûl ettiğinden sonra hukūk-ı zevciyete müte‘allika olan âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 26 min-Cumâdelûlâ sene 1121 Şuhûdü’l-hâl: Halil Efendi b. Mustafa el-İmâm, İbrahim Efendi el-Müezzin, el-Hâc Mehmed b. Sâdık Haffâf, el-Hâc Hüseyin Çelebi b. Ahmed, Ebûbekir Ağa b. Mahmud Efendi, Mustafa Ağa b. Halil, Mehmed Ağa b. İsa, Mehmed Çelebi b. Mustafa ve gayruhum mine’l-huzzâr.