Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 276 Hüküm no: 274 Orijinal metin no: [37b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdullah Çelebi b. Hacı Ali’nin Çengelköy’deki bağını Mehmed Ağa b. Ali’ye sattığı Mahmiye-i İstanbul’da Çelebioğlu Mahallesi’nde sâkin es-Seyyid Abdullah Çelebi b. el-Hâc Ali nâm kimesne mahfil-i kazâda işbu râfi‘u’l-kitâb Mehmed Ağa b. Ali nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup medîne-i Üsküdar’a tâbi‘ Çengel nâm karyede vâki‘ bir tarafdan Çolak zimmî bağı ve bir tarafdan Burnaz zimmî bağı ve bir tarafdan müşteri-i mezbûrun tarlası ve bir tarafdan baʻzan Mihail oğlu zimmî bağı ve baʻzan tarîk-i âm ile mahdûd arsasının senede merhûm Fazlullah Paşa Vakfı’na yüz yirmi akçe mukāta‘a-i kadîmesi olup kürûmî mülk bağımı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Mehmed Ağa’ya on üç guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr on üç guruşu mezbûr Mehmed Ağa yedinden tamamen ahz u kabz eyledim baʻde’l-yevm bağ-ı mahdûd-ı mezkûr cemî‘ müştemilâtıyla mezbûr Mehmed Ağa’nın mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 min-Cumâdelûlâ sene 1121 Şuhûdü’l-hâl: Es-Seyyid Mustafa Çelebi b. es-Seyyid Mehmed, Çavuşzâde el-Hâc Mehmed b. İdris, Mücâvirzâde Abdullah Efendi, Takavî Mehmed Çelebi b. ( ) ve gayruhum mine’l-huzzâr.