Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 277 Hüküm no: 275 Orijinal metin no: [37b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Yani’nin Nişancı Ca‘fer Mahallesi’ndeki evini Yani v. Panoyot’a sattığı Mahmiye-i İstanbul’da Nişancı Ca‘fer Mahallesi’nde sâkin Dimitri v. Yani nâm zimmî mahfil-i kazâda işbu râfi‘u’s-sifr Yani v. Panayot nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Anastaş nâm zimmî tasarrufunda olan vakıf menzil ve bir tarafdan Bostancı Dodko nâm zimmî tasarrufunda olan vakıf menzil [38a] ve bir tarafdan Mehmed Efendi nâm kimesne vakfı olan menzil ve bir tarafdan tarîk-i âm ile mahdûd fevkānî bir bâb oda ve bir kenîf ve dehlîzi müştemil mülk menzilimi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Yani zimmîye yüz kırk guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr yüz kırk guruşu mezbûr Yani zimmî yedinden tamamen ahz u kabz eyledim baʻde’l-yevm menzil-i mahdûd-ı mezkûr cemî‘ müştemilâtıyla mezbûr Yani zimmînin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 min-Cumâdelûlâ sene 1121 Şuhûdü’l-hâl: Mahmud Beşe b. Osman, Derzi Ahmed b. Abdullah, Ali Beşe b. Abdullah, Saka Mehmed b. Veli, el-Hâc Mehmed b. İdris, Osman Efendi b. Mehmed el-İmâm, Ahmed Halîfe el-Müezzin, Abdullah Çelebi b. Mehmed, Mehmed Halîfe b. Abdullah, Abdi Ağa b. Ali ve gayruhum mine’l-huzzâr. Papa Yani v. Kiga, Yamandi v. Miro, İstefandoni v. Yamandi, Kiro v. Hristo, Anastaş v. Gavril, Rodo v. Tano, Sava v. Kiryako, Pelaş v. Yamandi, Yani v. Nikola.