Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 278 Hüküm no: 276 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Hacı Salih b. İbrahim b. Halil’in küçük çocuğunun vasisi olup hacca gidecek olan Mustafa Beşe b. İbrahim’in dönünceye kadar yerine Hacı Abdullah Ağa b. Abdullah’ı vekil tayin ettiği Mahmiye-i İstanbul’da Mahmudpaşa Mahallesi’nde sâkin iken bundan akdem vefât eden el-Hâc Salih b. İbrahim b. Halil’in sulbî oğlu ( ) nâm sagīrin emvâlini hıfz ve umûrunu ikāmet için kıbel-i şer‘den mansûb vasîsi olan Mustafa b. İbrahim nâm kimesne meclis-i şer‘-i şerîf-i enverde işbu hâfızü’l-kitâb el-Hâc Abdullah Ağa b. Abdullah nâm kimesne mahzarında ikrâr ve takrîr-i kelâm edip üzerime hac farz olmağla bu sene-i mübârekede Beytullâhi’l-harâm için âzim olmam ile sagīr-i mezbûrun umûrunu ben gelince ikāmet için bir vekîl nasbı lâ-büd olmağın tarafımdan husûs-ı mezbûru ikāmete mezbûr el-Hâc Abdullah Ağa’yı vekîl ve nâib-i menâb nasb u ta‘yîn eylediğimde ol dahi vekâlet-i mezbûreyi kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 15 min-Cumâdelûlâ sene 1121 Şuhûdü’l-hâl: Ahmed Çelebi b. Kasım, Mustafa Ağa Paşazâde, Molla Mustafa b. el-Hâc Mehmed, Molla Ahmed b. el-mezbûr, el-Hâc Mustafa b. İbrahim, Ahmed Efendi b. Yusuf ve gayruhum mine’l-huzzâr.