Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 278 Hüküm no: 277 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdullah Çelebi b. İbrahim’in Akşemseddin Mahallesi’ndeki evini Mustafa Çelebi b. Hüseyin’e sattığı Mahmiye-i İstanbul’da Akşemseddin Mahallesi sükkânından es-Seyyid Abdullah Çelebi b. İbrahim nâm kimesne meclis-i şer‘-i şerîf-i enverde işbu râfi‘u’l-kitâb Mustafa Çelebi b. Hüseyin nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan Akşemseddinzâde Mehmed Efendi mülkü ve bir tarafdan Hamza Odabaşı mülkü ve bir tarafdan Bakkāl Hacı Ahmed mülkü ve bir tarafdan tarîk-i hâs ile mahdûd fevkānî bir bâb oda ve bir sofa ve iki bâb tahtânî oda ve bir kenîf ve bir mikdâr havluyu müştemil merhûm Sultan Bayezid Vakfı’na senede dört akçe mukāta‘a-i kadîme olup binâsı mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile iki yüz on bir guruşa mezbûr Mustafa Çelebi’ye bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabûl eylediğinden sonra semeni olan meblağ-ı mezbûr iki yüz on bir guruşu mezbûr Mustafa Çelebi yedinden tamamen ahz u kabz eyledim baʻde’l-yevm menzil-i mahdûd-ı mezkûr cemî‘ müştemilâtıyla merkūm Mustafa Çelebi’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 min-Cumâdelûlâ sene 1121 Şuhûdü’l-hâl: İbrahim Çelebi b. Receb, Ahmed Çelebi b. Ali, Abdullah Çelebi b. Hasan, es-Seyyid Hüseyin b. Mehmed, Mehmed Çelebi b. Mustafa, Halil Efendi b. el-Hâc Mustafa, el-Hâc Musa b. Ali, Muslu Çelebi b. Osman, Mehmed Çelebi b. İbrahim, es-Seyyid Ali Çelebi b. Abdullah ve gayruhum mine’l-huzzâr.