Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 279 Hüküm no: 278 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sima bt. Abgar’ın daha önce kendisini bırakıp başka yere giden kocası Avak v. Norsis’in emriyle geçimi için borçlandığı paraya mukabil Avak’tan otuz guruş tahsiline razı olduğu Mahmiye-i İstanbul’da Langa Bostanı kurbünde sâkine Sima bt. Abgar nâm Nasrâniye meclis-i şer‘-i şerîf-i enverde zevci işbu râfi‘u’l-vesîka Avak v. Norsis nâm zimmî muvâcehesinde ikrâr ve takrîr-i kelâm edip mezkûr Avak zevcim olup târih-i kitâbdan sekiz sene mukaddem diyâr-ı âhara gider oldukda nafaka ve kisve ve sâir levâzım-ı zarûriyyem için kifâyet mikdârı akçe âhardan istidâne ve levâzım-ı zarûriyyeme sarf etmek üzere bana emr etmekle ben dahi mezkûrun emrine binâen bi-şartü’r-rücû‘ âhardan ma‘lûmü’l-mikdâr akçe istidâne ve ber-vech-i muharrer harc u sarf eylediğimden sonra hâlâ mezkûr Avak’dan taleb ve da‘vâ eylediğimde ol dahi emrini inkâr etmekle beynimizde nizâ‘-ı küllî vukū‘undan sonra beynimize muslihûn tavassut edip da‘vâ-yı mezkûremden beni otuz guruş üzerine sulh eylediklerinde ben dahi sulh-ı mezkûru kabûl ve mezkûr Avak’ın bedel-i sulhü ucâleten edâya iktidârı olmayıp te’cîle tâlib olmağla târih-i kitâbdan otuz bir gün tamamına değin te’cîl eyledim dedikde ol dahi kabûl ve meblağ-ı mezbûru ecel-i mezkûr hulûlünde edâya ta‘ahhüd eylediğinden sonra mezkûr Avak’ın deyni olan meblağ-ı mezkûr otuz guruşa tarafeynden emr ve kabûlü hâvî kefâlet-i sahîha ile Sahak v. Begos nâm zimmî [kefîl] olmağın mâ-hüve’l-vâki‘ bi’t-taleb ketb olundu. Fî 27 min-Cumâdelûlâ sene 1121 Şuhûdü’l-hâl: Es-Seyyid Mehmed Çelebi b. es-Seyyid Hüseyin, İbrahim Çelebi b. Hasan, el-Hâc Ali b. Hasan, el-Hâc Hasan b. Hüseyin, Yunus Beşe b. Hasan, Ahmed Beşe b. Ali, Ali Çelebi b. İvaz, Mehmed Çelebi b. Ali ve gayruhum mine’l-huzzâr. Bağdasar v. Toros, Anastaş v. Sava, Aritun v. Agop