Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 279 Hüküm no: 279 Orijinal metin no: [38a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mehmed’in geçinemediği kocası Osman Beşe b. Ali’den boşandığı Mahmiye-i İstanbul’da Ali Paşa-yı Atîk Mahallesi sâkinelerinden Hadice bt. Mehmed nâm hatun tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân el-Hâc Salih b. Ahmed ve Osman b. Mustafa nâm kimesneler şehâdetleriyle şer‘an sâbit olan Mehmed Beşe b. Ali Dede nâm kimesne meclis-i şer‘-i şerîf-i enverde müvekkile-i mezbûrenin zevci işbu hâfızü’r-rakīm Osman Beşe b. Ali nâm kimesne mahzarında ikrâr ve takrîr-i kelâm edip müvekkilem mezbûre Hadice Hatun’un zevci mezbûr Osman Beşe ile beynlerinde hüsn-i zindegāneleri olmamağla zimmetinde mütekarrer ve ma‘kūdün-aleyh olan iki bin iki yüz akçe mehr-i müecceli ve nafaka-i iddet-i mu‘ayyene-i ma‘lûmesi üzerlerine ve meûnet-i süknâsı dahi kendi üzerine olmak üzere zevci mezbûr Osman Beşe ile muhâla‘a-i sahîha-i şer‘iyye ile hul‘ olduğunda ol dahi vech-i meşrûh [38b] [üzere] hul‘-ı mezkûru kabûl eylediğinden sonra hukūk-ı zevciyete ve gayra müte‘allika olan âmme-i da‘vâdan her biri âharın zimmetini ibrâ-i âmm-ı râfi‘u’n-nizâ‘la ibrâ ve iskāt eylediler dedikde gıbbe’t-tasdîkı’l-mer‘î mâ-hüve’l-vâki‘ bi’t-taleb ketb olundu. Fî 27 min-Cumâdelûlâ sene 1121 Şuhûdü’l-hâl: el-Hâc Salih b. Ahmed, Osman b. Mustafa, Mehmed Çavuş b. Ahmed, Ali b. Mehmed, Osman b. Hasan, el-Hâc Mehmed b. İdris, Mustafa b. Şa‘ban, Ali Çelebi b. İvaz, Hasan Çelebi b. Mustafa ve gayruhum mine’l-huzzâr.