Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 280 Hüküm no: 280 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukurbostan Mahallesi’nden Fâtıma bt. Ahmed’in geçinemediği kocası Hüseyin b. Hasan’dan boşandığı <> sehv olunup mükerrer olmak lâzım gelmekle hazer olundu. Mahmiye-i İstanbul’da Sultan Selim kurbünde Çukurbostan Mahallesi’nde sâkine olup zâtı Hasan b. Mustafa ve Halil b. Mehmed nâm kimesneler ta‘rîfleriyle mu‘arrefe olan Fâtıma bt. Ahmed nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb Hüseyin b. Hasan nâm kimesne mahzarında ikrâr ve takrîr-i kelâm edip zevcim mezbûr Hüseyin ile beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Hüseyin ile muhâla‘a-i sahîha-i şer‘iyye ile muhâla‘a eylediğimde ol dahi ber-vech-i muharrer hul‘-ı mezbûru kabûl eylediğinden sonra hukūk-ı zevciyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘ ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Cumâdelûlâ [sene] 1121 Şuhûdü’l-hâl: Mustafa b. Şa‘ban, Hasan b. Mustafa, Mehmed b. Ahmed, Ali b. Bâli, Abdullah