Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 281 Hüküm no: 281 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gönye kasabasından Ayşe bt. Ali b. Ebûbekir’i bırakıp altı senedir İstanbul’da olan kocası Ali Beşe b. Mustafa’dan Ayşe’nin nafaka için borçlandığı yetmiş beş guruşun tahsil edilmesi Vilâyet-i Anadolu’da Gönye kasabasında sâkine Âişe bt. Ali b. Ebûbekir nâm hatun tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân Ali Beşe b. Hüseyin ve Hasan b. İslam nâm kimesneler şehâdetleriyle şer‘an sâbit olan işbu hâfızü’r-rakīm Ali Beşe b. Mustafa nâm kimesne meclis-i şer‘-i şerîf-i enverde müvekkile-i mezbûre Âişe Hatun’un zevc-i dâhili diğer Ali Beşe b. Hasan mahzarında bi’l-vekâle üzerine da‘vâ ve takrîr-i kelâm edip müvekkile-i mezbûre Âişe Hatun’u târih-i kitâbdan altı sene mukaddem zevci mezbûr diğer Ali Beşe bilâ-nafaka bırakıp İstanbul’a gider oldukda müvekkilem mezbûrenin nafaka ve kisvesiʼçün âhardan istidâne ve meblağ-ı müstedâneyi levâzımına harc u sarf ve kendiye rücû‘ etmek üzere mezbûre Ayşe’ye emr edip ve mezbûre Âişe dahi zevci mezbûr diğer Ali’nin emrine binâen âhardan yetmiş guruş istidâne ve kabz ve mesârifine sarf etmekle hâlâ meblağ-ı müstedâne-i mezbûru zevci mezbûr diğer Ali Beşe’den bi’l-vekâle taleb ederim suâl olunsun dedikde gıbbe’s-suâl mezbûr diğer Ali Beşe cevâbında fi’l-vâki‘ altı seneden beri zevcesi müvekkile-i mezbûreyi zikr olunan Gönye kasabasında bırakıp kendi İstanbul’da mütemekkin olduğunu ikrâr lâkin ber-vech-i muharrer emrini ve müvekkile-i mezbûrenin meblağ-ı mezbûru âhardan istidâne ve kabzını ve mesârifine sarf eylediğini inkâr edicek vekîl-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup zikri mürûr eden Gönye kasabasından Hacana Mahallesi ahâlîsinden olup mahmiye-i İstanbul’da Tavukpazarı kurbünde vâki‘ Bayram Paşa hanında müsâfiren sâkin Ahmed b. Mehmed ve Musa b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mezbûr diğer Ali Beşe târih-i kitâbdan altı sene mukaddem zevcesi müvekkile-i mezbûre Âişe bt. Molla Ali b. Ebûbekir nâm hatunu kendi İstanbul’a gider oldukda müvekkile-i mezbûrenin nafakası için âhardan istidâne ve kabz ve levâzımına sarf edip kendiye rücû‘ etmek üzere bizim huzûrumuzda mezbûre Ayşe’ye emr edip mezbûre Âişe dahi zevci mezbûr diğer Ali’nin emrine binâen âhardan yetmiş guruş istidâne ve kabz ve nafakasına harc u sarf eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince meblağ-ı müstedâne-i mezbûr yetmiş guruşu müvekkile-i mezbûre için vekîl-i mezbûr Ali Beşe’ye edâ ve teslîme zevci merkūm diğer Ali Beşe’ye tenbîh-birle mâ-vaka‘a bi’t-taleb ketb olundu. Fî 27 min-Cumâdelûlâ sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Ali b. Bâli, Mehmed b. Mehmed, Hasan Çelebi b. Mustafa, Ahmed b. Ali, Hasan Bey b. Abdullah, Mustafa b. Bayram, Hasan b. Abdullah