Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 282 Hüküm no: 283 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Abdullah’ın evinin yarısını İbrahim Beşe b. Mehmed’e sattığı Mahmiye-i İstanbul’da Topkapısı dâhilinde vâki‘ Emîn-i Cev Mahallesi sâkinlerinden Mehmed Beşe b. Abdullah nâm kimesne meclis-i şer‘-i şerîf-i enverde işbu râfi‘u’l-kitâb İbrahim Beşe b. Mehmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup arsasının senede merhûm ve mağfûrun-leh Sultan Bayezid-i Velî Vakfı’na üç akçe mukāta‘a olup mahalle-i mezkûrda vâki‘ bir tarafdan Saraylı Hatun menzili ve bir tarafdan Sorguççu İsmail Çelebi menzili veresesi mülkleri ve bir tarafdan Berber Mustafa Çelebi mülkü ve bir tarafdan tarîk-i âm ile mahdûd iki bâb fevkānî oda ve kenîf ve havluyu müştemil mülk menzilimin nısf-ı şâyi‘ini tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm İbrahim Beşe’ye seksen beş guruşa bey‘ ve temlîk ve teslîm ol dahi vech-i muharrer üzere iştirâ ve temellük ve tesellüm ve kabz ve kabûl eylediğinden semeni olan meblağ-ı mezbûr[u] merkūm İbrahim Beşe yedinden tamamen ahz u kabz eyledim baʻde’l-yevm menzil-i mezbûrun nısf-ı şâyi‘i merkūm İbrahim Beşe’nin mülk ve hakkı olmuşdur benim alâka ve medhalim kalmamışdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Cumâdelûlâ li-sene ihdâ ve işrîn ve miʼete ve elf. Şuhûdü’l-hâl: Ahmed Efendi el-İmâm, Hasan Beşe b. Abdullah, Mustafa Çelebi Berber, Receb Çelebi b. Abdullah, Mehmed Çelebi b. el-Hâc Ahmed Efendi, el-Hâc Ali Sorguççu