Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 283 Hüküm no: 284 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ariton v. Margos v. Madram’ın vârislerinden kızı Varnuk’un terekedeki hissesini sulh yoluyla üvey anası Sara bt. Melkon’dan aldığı Mahmiye-i İstanbul’da Tülbentçi Hüsam Mahallesi sükkânından iken bundan akdem hâlik olan Ariton v. Margos v. Madram nâm Ermeninin verâseti zevce-i metrûkesi Sara bt. Melkon nâm Ermeniye ile sulbî kebîr oğlu Mardiros ve sulbiye kebîre kızı Varnuk nâm Ermeniye münhasıra ve tashîh-i mes’elesi yirmi dört sehmden olup sihâm-ı mezbûreden üç sehmi mezbûre Sara’ya ve on dört merkūm Mardiros’a ve yedi sehmi mezbûr Varnuk’a isâbet eylediği şer‘an zâhir ve müte‘ayyin oldukdan sonra mezbûre meclis-i şer‘-i şerîf-i enverde işbu râfi‘atü’l-kitâb üvey anası mezbûre Sara muvâcehesinde ikrâr-ı tâm ve takrîr-i kelâm edip târih-i kitâbdan altı sene mukaddem mezbûre Sara babam hâlik-i mezbûrun terekesinden olup cümlemize irsen isâbet eden nakd altı yüz guruşu ahz u kabz edip ve ihfâ ve kendi mesârifine sarfla istihlâk edip hattâ tereke-i hâlike-i mezbûreden meblağ-ı mezbûr nakd altı yüz guruşu ahz ve ihfâ eylediğini huzûr-ı Müslimînde ikrâr dahi etmekle meblağ-ı mezbûrdan benim hisseme isâbet eden üç yüz elli guruşu hâlâ mezbûr Sara’dan taleb ve da‘vâ ve isbât ve baʻde’l-hükm mezbûre Sara dahi cihet-i karzdan senin zimmetinde beş yüz [guruş] hakkım vardır deyü benden da‘vâ sadedinde olmağla beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü [hâzihî] beynimize muslihûn tavassut edip da‘vâ-yı mezkûremden beni mezbûre Sara ile iki yüz guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki yüz guruşu mezbûre Sara yedinden tamamen ahz u kabz ve bi’l-cümle tereke-i müteveffâ-i mezbûra ve târih-i kitâba gelince beynimizde cereyân eden ahz u i‘tâ [ve] mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan mezbûre Sara’nın zimmetini ibrâ ve iskāt eyledim ve mezbûre Sara dahi kezâlik meblağ-ı mezbûr beş yüz guruşa ve tereke-i müteveffâ-i mezbûra ve bedel-i sulh deyü bana medfû‘u olan iki yüz guruşa ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan benim zimmetimi ibrâ ve iskāt fîmâ-ba‘d birbirimiz ile vechen mine’l-vücûh kat‘â da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Cumâdelûlâ sene 1121 Şuhûdü’l-hâl: Mehmed Ağa b. Abdullah Kethüdâ-yı muhzırân, Mehmed Çelebi b. Abdullah, Mustafa Çelebi b. Şa‘ban, Receb Çelebi b. Süleyman, Halil Çelebi b. Mehmed, Ali Çelebi b. Bâli, Ali b. İvaz