Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 284 Hüküm no: 285 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Enco bt. Delot ölen babasında alacağı olduğu iddiasıyla kardeşi Kayser’e açtığı davayı ispat edemeği Mahmiye-i İstanbul’da Meryem Ana kilisesi kurbünde sâkine Enco bt. Delot nâm Nasrâniye dîvân-ı hazret-i sadr-ı aʻzamîde ma‘kūd mahfil-i kazâda li-ebeveyn karındaşı işbu râfi‘u’s-sifr Kayser nâm zimmî mahzarında üzerine da‘vâ ve takrîr-i kelâm edip mukaddemâ hâlik olan babam merkūm Delot zimmetinde karzdan temessük nâtık olduğu üzere üç yüz guruş hakkım olup karındaşım merkūm Kayser cümle tereke[yi] zabt etmekle meblağ-ı mezbûru taleb ederim suâl olunup muhallefâtından bana edâya tenbîh olunmak matlûbumdur dedikde gıbbe’s-suâl merkūm Kayser cevâbında deyn-i mezbûru ve terekeyi kabzını inkâr edicek müdde‘iye-i mezbûreden evvelen deyn-i mezkûru mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka hâlik-i merkūmun müdde‘iye-i merkūmeye cihet-i karzdan üç yüz guruş deyni olduğunu bilmediğine merkūm Kayser’e yemîn teklîf olundukda ol dahi hasbe’l-mesûl yemîn biʼllâhi’llezî enzele’l-İncîle alâ İsa aleyhi’s-selâm etmeğin mûcebince müdde‘iye-i merkūme bilâ-beyyine mu‘ârazadan men‘-birle mâ-vaka‘a bi’t-taleb ketb olundu. Fî 24 min-Cumâdelûlâ sene 1121 Şuhûdü’l-hâl: el-Hâc Mustafa Efendi, Halil Çavuş el-Mübâşir, Ebûbekir Efendi b. ( ), el-Hâc Hüseyin Beşe Çukadâr ve gayruhum mine’l-huzzâr. <>