Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 285 Hüküm no: 287 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kağıdcı esnafının talepleriyle kethüdaları Hacı İsmail’in azledilip yerine İdris Çelebi b. İsmail’in tayin edildiği Mahmiye-i İstanbul’da vâki‘ kâğıdcı tâifesinden İbrahim Çelebi b. Mehmed ve Mehmed Çelebi b. Abdülfettâh ve diğer Mehmed Çelebi b. Ahmed ve İbrahim Çelebi b. Mehmed ve diğer İbrahim Çelebi b. Mehmed ve İlyas Çelebi b. Mustafa ve Mustafa Çelebi b. Hızır ve Ahmed Çelebi b. Murad ve el-Hâc Mustafa b. Abdullah ve Mustafa b. Süleyman ve Musa b. Mahmud ve Abdullah b. Mustafa ve Ali b. İbrahim ve Mehmed b. Hüseyin ve el-Hâc Muslu b. Mustafa ve İbrahim Çelebi b. Seyfullah ve Mustafa Çelebi b. Ahmed ve Ahmed Çelebi b. Mahmud ve Nuri Çelebi b. İbrahim ve sâirleri meclis-i şer‘-i şerîf-i enverde yine hirfet-i mezbûreden işbu bâ‘isü’l-kitâb İdris Çelebi b. İsmail mahzarında her biri ikrâr ve takrîr-i kelâm edip kethüdâmız olan el-Hâc İsmail nâm kimesnenin akvâl ve ef‘âlinden her birimiz müteezzî ve müteşekkî olmağla mezbûr el-Hâc İsmail ref‘ işbu mezbûr İdris Çelebi-cümlemizin muhtârı olmağla üzerimize kethüdâ nasb olunmasını ihtiyâr eyledik dediklerinde mezbûrûnun iltimâsları ile merkūm İdris Çelebi hirfet-i mezbûre üzerine kıbel-i şer‘den kethüdâ nasb u ta‘yîn olundukda ol dahi kabûl etmeğin mâ-hüve’l-vâki‘ bi’t-taleb ketb olundu. Fî 27 min-Cumâdelûlâ sene 1121 Şuhûdü’l-hâl: Mehmed Çelebi b. Abdi, Mustafa Çelebi b. Şa‘ban, Hasan b. Abdullah, Abdullah b. Abdullah ve gayruhum mine’l-huzzâr.