Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 285 Hüküm no: 288 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zafiri v. Avyonos ev, mahzen, bahçe ve bağını Fâtıma Hatun Nukud Vakfı’na istiğlal yoluyla satıp tekrar kendisi kiraladığı Mahrûse-i Galata’ya tâbi‘ Marmara nâhiyesinde Asmalı nâm karye ahâlîsinden Zafiri v. Avyonos nâm zimmî meclis-i şer‘-i şerîf-i enverde merhûm Benli Ahmed Ağa zevcesi Fâtıma nâm sâhibetü’l-hayrın nukūd-ı mevkūfesine bi’l-fi‘il mütevellî olan hâfızu hâze’l-kitâb Abdullah Efendi b. Ali Efendi mahzarında ikrâr ve takrîr-i kelâm edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir bâb menzil ve mukābilinde vâki‘ bir bâb mahzen ve çeşme kurbünde vâki‘ lede’l-ahâlî ve’l-cîrân ma‘lûmü’l-hudûd bir kıt‘a bahçe ve yine karye-i mezbûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd Luzec nâm mevki‘de vâki‘ bir kıt‘a kürûmî mülk bağımı cümle tevâbi‘ ve levâhıkı ile mütevellî-i mezbûr Abdullah Efendi’ye bi-safkatin vâhidetin iki yüz on guruşa bi-tarîkı’l-istiğlâl bey‘ ve teslîm ol dahi yedinde olan mâl-ı vakf-ı mezbûr ile ber-vech-i muharrer iştirâ ve kabz ve kabûl eyledikden sonra semeni olan meblağ-ı mezbûr iki yüz on guruşu mütevellî-i mezbûr yedinden tamamen ahz u kabz eyledim dedikde gıbbe’t-tasdîkı’l-mer‘î mütevellî-i merkūm Abdullah Efendi zikri mürûr eden menzil ve mahzen ve bahçe ve bağı ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamamına değin yirmi altı guruşa bana îcâr ve teslîm ben dahi ber-vech-i muharrer istîcâr ve kabz ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Cumâdelûlâ sene 1121 Şuhûdü’l-hâl: Ömer Efendi b. Şükrullah, Abdulkādir Efendi b. Şa‘ban, Hâfız Mehmed Efendi b. Ramazan Münâdî, el-Hâc Mustafa b. Sefer sâkin-i Marmara, Mustafa Çelebi b. Abdülgani Marmara’dan, Süleyman Çelebi b. Sinan, Mustafa Beşe b. Sinan, Ahmed Çelebi b. Mehmed Ağa, Mustafa Çelebi b. Şa‘ban ve gayruhum mine’l-huzzâr. Aci Pelaş v. Yanaki.