Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 287 Hüküm no: 290 Orijinal metin no: [39b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Can bt. Toros’dan vârislerinden kızı İva’nın terekeden olan evdeki hissesini diğer vâris Mardiros v. Begos’a sattığı Mahmiye-i İstanbul’da Edirnekapısı kurbünde Ali Paşa-yı Atîk Mahallesi’nde sâkine iken bundan esbak hâlike olan Can bt. Toros nâm Nasrâniyenin verâseti kızları İva ve Varvara ve oğlu Begos’un oğlu Mardiros nâm zimmîye münhasıra ve tashîh-i mes’eleleri üç sehmden olup sihâm-ı mezkûreden birer sehmi mezkûretân İva ve Varvan’dan her birine ve bir sehmi mezkûr Mardiros’a isâbet ve intikāl eylediği şer‘an zâhir ve mütebeyyin oldukdan sonra mezkûre İva ba‘de’t-ta‘rîfi’ş-şer‘î meclis-i şer‘-i şerîf-i enverde işbu râfi‘u’l-vesîka mezkûr Mardiros’un muvâcehesinde [40a] ikrâr ve takrîr-i kelâm edip mûrisemiz hâlike-i mezkûrenin terekesinden olup mahalle-i mezkûrede vâki‘ bir tarafdan Hammâmî Vartan zimmî mülkü ve bir tarafdan Sak zimmî mülkü ve bir tarafdan mezkûr Mardiros mülkü ve bir tarafdan tarîk-i âm ile mahdûd bir oda ve sofa ve kenîfi müştemil mülk menzilden tashîh-i mezkûr üzere bana isâbet eden bir sehm hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezkûr Mardiros’a otuz iki guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezkûr otuz iki guruşu mezkûr Mardiros yedinden bi’t-tamam ve’l-kemâl ahz u kabz eyledim baʻde’l-yevm menzil-i mezkûrun bir sehm-i şâyi‘i dahi mezkûr Mardiros’un mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 28 min-Cumâdelûlâ sene 1121 Şuhûdü’l-hâl: İbrahim Efendi b. Cemaleddin el-İmâm, Abdülkerim Efendi el-Kayyum, Lütfullah Efendi b. İsmail el-Müezzin, Molla İbrahim b. Ahmed el-Müezzin, Mehmed Çelebi b. Mustafa dâmad-ı imâm, Mustafa Çelebi b. Şa‘ban, Hasan b. Mustafa, Hüseyin b. Hasan, Osman b. Hasan ve gayruhum mine’l-huzzâr. Papa Karabet v. Norsis, Serkis v. Kirkor, Papa Dimya v. Agop, Serkiz v. Karader?, Mardiros v. İstefan