Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 288 Hüküm no: 292 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Sâliha bt. Seyyid Mehmed’in geçinemediği kocası İbrahim Beşe b. Ali’den boşandığı Mahmiye-i İstanbul’da Mimâr Ayas Mahallesi sâkinelerinden olup zâtı Abdullah b. Ali ve Mehmed b. Ömer ta‘rîfleriyle mu‘arrefe olan Şerife Sâliha bt. es-Seyyid Mehmed nâm hatun meclis-i şer‘-i şerîf-i enverde zevc-i dâhili işbu râfi‘u’r-rakīm İbrahim Beşe b. Ali nâm kimesne mahzarında ikrâr ve takrîr-i kelâm edip mezbûr İbrahim Beşe zevcim olup beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan üç bin yedi yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine mezbûrun firâşından hâsıletân ve benden mütevellidetân ve bi-hakkı’l-hıdâne hâlâ hacr ve terbiyemde olan kızlarım Fâtıma ve Âişe’yi hakk-ı hıdâne sükūtuna değin kendi mâlımdan infâk ve iksâ etmek üzere ve meûnet-i süknâm dahi kendi üzerime olmak üzere zevcim mezbûr İbrahim Beşe ile muhâla‘a-i sahîha-i şer‘iyye ile muhâla‘a olduğumda ol dahi vech-i meşrûh üzere hul‘-ı mezkûru kabûl ettiğinden sonra hukūk-ı zevciyete müte‘allika olan âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 29 min-Cumâdelûlâ sene 1121 Şuhûdü’l-hâl: Abdullah b. Ali, Mehmed b. Ömer, Mehmed b. el-Hâc İbrahim, Mehmed b. İbrahim, Hüseyin b. Ali ve gayruhum mine’l-huzzâr.