Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 289 Hüküm no: 293 Orijinal metin no: [40a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çaşnigîr Osman Ağa zevcesi Kamer Hatun Vakfı’ndan Hoca Üveys Mahallesi’ndeki hamamın Mahmud Ağa b. Mustafa’ya kiralandığı Mahmiye-i İstanbul’da Çaşnigîr Osman Ağa zevcesi merhûme Kamer Hatun Vakfı mütevellîsi olan Ali Çelebi b. Muslihiddin nâm kimesne mahfil-i kazâda işbu râfi‘u’l-kitâb Mahmud Ağa b. Mustafa nâm kimesne mahzarında bi’t-tevliye ikrâr ve takrîr-i kelâm edip vakf-ı mezbûrdan olup mahmiye-i mezbûrda Hoca Üveys Mahallesi’nde vâki‘ ma‘lûmü’l-hudûd bir halvetli ve dört kurnalı ve iki kapılı bir tek hamam baʻde’n-nidâ ve’l-müzâyede ve inkıtâ‘u’r-ragabe yevmî sekiz akçe ücret-i müeccele ve otuz bin akçe icâre-i mu‘accele ile mezbûr Mahmud Ağa üzerinde karâr edip ziyâde ile tâlib-i âharı zuhûr etmeyip ve hamam-ı mezkûrun ecr-i misli el-yevm ol mikdâr olduğu zeyl-i kitâbda isimleri mastûr olan Müslimîn ihbârlarıyla hâkim-i muvakki‘-ı sadr-ı kitâb hazretleri huzûr-ı fâizü’n-nûrlarında mütehakkık olmağın hâlâ tevliyetim hasebiyle hamam-ı mezkûru yevmî sekiz akçe ücret-i müeccele ve otuz bin akçe icâre-i mu‘accele ile mezbûr Mahmud Ağa’ya îcâr ve teslîm ol dahi baʻde’l-istîcâr ve’t-tesellüm meblağ-ı mezbûr otuz bin akçeyi mezbûr Mahmud Ağa’dan bi’t-tevliye vakıf için ahz u kabz eyledim dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 27 min-Cumâdelûlâ sene 1121 Şuhûdü’l-hâl: el-Hâc Mustafa Efendi b. Veli el-İmâm, İsmail Efendi b. Mustafa, Mehmed Çelebi b. Ali, Ömer Çelebi b. Mehmed, Abdullah Efendi b. Abdülbâki, Mehmed b. Ali, Ömer b. Mehmed, Mustafa b. Mehmed Kâtib-i vakf, ve gayruhum mine’l-huzzâr.