Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 289 Hüküm no: 294 Orijinal metin no: [40a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabiha bt. Ahmed’in mehri ve nafaka bedelleri için belirlenen parasını boşandığı kocası İbrahim b. Ahmed’den teslim aldığı Mahmiye-i İstanbul’da Molla Hüsrev Mahallesi sâkinelerinden olup zâtı Ahmed b. Ali ve diğer Ahmed b. Mehmed nâm kimesneler ta‘rîfleriyle mu‘arrefe olan Sabiha bt. Ahmed nâm hatun mahfil-i kazâda zevc-i dâhili işbu bâ‘isü’l-kitâb İbrahim b. Ahmed b. Mehmed nâm kimesne tarafından husûs-ı âti’l-beyânı tasdîka vekîl-i sâbitü’l-vekâlesi olan karındaşı oğlu Hasan Beşe b. Mehmed nâm kimesne mahzarında ikrâr ve takrîr-i kelâm edip zevcim mezbûr İbrahim bundan akdem beni bâyinen tatlîk etmekle zimmetinde mütekarrer ve ma‘kūdün-aleyh olan bin akçe mehr-i müeccelim ve iddet-i nafaka ve meûnet-i süknâm için dahi bi’t-terâzî ta‘yîn olunan üç yüz akçe ki cem‘an bin üç yüz akçeyi vekîl-i mezbûr Hasan Beşe yedinden tamamen ahz u kabz edip mehr-i mezkûre ve sâir hukūk-ı zevciyete müte‘allika âmme-i da‘vâdan ben zevcim mezbûrun zimmetini ibrâ-i âm ile ibrâ ve iskāt edip ve vekîl-i mezbûr dahi kezâlik hukūk-ı zevciyete müte‘allika âmme-i da‘vâdan benim zimmetimi ibrâ-i âm ile ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 min-Cumâdelâhire sene 1121 Şuhûdü’l-hâl: Ömer b. Mehmed, Mehmed b. Şa‘ban, Mustafa b. Şa‘ban, Ali b. Bâli, Hasan b. Mustafa, Ali b. İvaz ve gayruhum mine’l-huzzâr.