Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 290 Hüküm no: 295 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Astarcı Bali v. Yani’nin Terzi Halil Çelebi’de olan alacağını taksitler halinde tahsil etmesi Astarcı tâifesinden Bali v. Yani nâm zimmî mahfil-i kazâda işbu râfi‘u’l-kitâb Derzi Halil Çelebi b. ( ) nâm kimesne mahzarında üzerine da‘vâ ve takrîr-i kelâm edip bundan akdem yedimden iştirâ ve kabz eylediği levn ve adedi beynimizde ma‘lûm astar ve bogası bahâsından ba‘de külli’l-hesâb üç bin yüz elli akçe hakkım olup taleb eylediğimde bana edâdan imtinâ‘ eder suâl olunup edâya tenbîh olunmak matlûbumdur dedikde gıbbe’s-suâl mezbûr Halil Çelebi cevâbında meblağ-ı mezbûr üç bin yüz elli akçeyi târih-i kitâb gurresinden beher mâh kendiye otuz altışar akçe verip mecmû‘unu seksen yedi buçuk ayda edâ etmek üzere beni te’cîl ve taksît etmişidi deyü def‘le mukābele edicek gıbbe’l-istintak ve akībe’l-inkâr mezbûr Halil Çelebi’den def‘-i mezkûrunu mübeyyine beyyine taleb olundukda udûl-i ahrâr-ı ricâl-i Müslimînden ve derzi tâifesinden Ali b. el-Hâc Osman ve Mahmud b. Ahmed nâm kimesneler li-ecli’ş-şehâde mahfil-i kazâya hâzırân olup istişhâd olunduklarında fi’l-vâki‘ müdde‘î-i mezbûr Yani hasmı mezbûr Halil Çelebi zimmetinde astar ve bogası bahâsından ba‘de külli’l-hesâb üç bin yüz elli akçe hakkını târih-i kitâb gurresinden kendiye otuz altışar akçe verip mecmû‘unu seksen yedi buçuk ayda edâ etmek üzere mezbûr Yani bizim huzûrumuzda te’cîl ve taksît eylemişidi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûru ber-vech-i muharrer mukassaten ahz edip def‘aten mutâlebe etmemek üzere mezbûr Yani bî-vech mu‘ârazadan men‘-birle mâ-vaka‘a bi’t-taleb ketb olundu. Fî 10 min-Cumâdelûlâ sene 1121 Şuhûdü’l-hâl: Fazlı Efendi el-Kâtib, Mustafa b. Şa‘ban, Ali b. Bâli, Hasan b. Mustafa, Ali b. İvaz, Osman b. Hasan ve gayruhum mine’l-huzzâr.