Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 291 Hüküm no: 296 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İbrahim b. Ali’nin Kazgancıbaşı Mahallesi’ndeki evini hanımı Emetullah bt. Abdullah’a sattığı Mahrûse-i Galata muzâfâtından kasaba-i Fındıklı’da Kazgancıbaşı Mahallesi sükkânından el-Hâc İbrahim b. Ali nâm kimesne meclis-i şer‘-i şerîf-i enverde zevcesi Emetullah bt. Abdullah nâm hatun tarafından husûs-ı âti’l-beyânı tasdîka vekîl olduğu zât-ı mezkûreyi ma‘rifet-i şer‘iyye ile ârifân İbrahim Çelebi b. Ali ve Ahmed Beşe b. Ali <> şehâdetleriyle şer‘an sâbit olan el-Hâc Mahmud b. Mehmed muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezkûrede vâki‘ bir tarafdan benim âhar mülküm ve bir tarafdan İsa Efendi veresesi mülkleri ve bir tarafdan baʻzan el-Hâc Hasan mülkü ve baʻzan vakıf menzil ve bir tarafdan tarîk-i hâs ile mahdûd fevkānî iki oda ve iki sofa ve dehlîz ve çeşme ve abdesthâne ve tahtânî iki oda ve bir matbah ve iki sofa ve bir çeşme ve mağsel ve kömürlük ve su kuyusunu ve cüneyne ve havluyu müştemil menzilimi cümle tevâbi‘ ve levâhıkı ve kâffe-i hukūk ve’l-merâfıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile altı yüz guruşa zevcem müvekkile-i mezkûre Emetullah’a bey‘ ve temlîk ve teslîm ol dahi ber-vech-i meşrûh iştirâ ve temellük ve tesellüm ve kabûl eylediğinden sonra semeni olan meblağ-ı mezkûr altı yüz guruşdan zevcem müvekkile-i mezkûrenin zimmetini ibrâ ve iskāt eyledim baʻde’l-yevm menzil-i mahdûd-ı mezkûr zevcem müvekkile-i mezkûrenin mülk-i müşterâsı ve hakk-ı sırfı olup benim alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 min-Cumâdelâhire sene 1121 Şuhûdü’l-hâl: el-Hâc Ali b. el-Hâc İbrahim, el-Hâc Mustafa b. el-Hâc Hasan, Abdullah Efendi b. el-Hâc Receb, Ahmed Çelebi b. Ali, Ali Çelebi b. İvaz, Mustafa Çelebi b. Şa‘ban ve gayruhum mine’l-huzzâr.