Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 291 Hüküm no: 297 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Abraham v. Kirkor v. Karagöz’ün vârislerinin kendilerine intikal eden evin satışından dolayı Serkiz v. Kirkor’a olan anlaşmazlıkta sulh oldukları Mahmiye-i İstanbul’da Edirnekapısı kurbünde vâki‘ Ali Paşa-yı Atîk Mahallesi’nde sâkin iken bundan akdem hâlik olan Abraham v. Kirkor v. Karagöz nâm Ermeninin verâseti sulbî kebîr oğlu Oseb ve sulbiye kebîre kızları Aksatya ve Sima’ya münhasıra olduğu şer‘an zâhir ve mütehakkık oldukdan sonra mezbûr Oseb kendi tarafından asâleten ve mezbûretân Aksatya ve Sima taraflarından husûs-ı âti’l-beyâna vekîl olduğu zâtlarını ma‘rifet-i şer‘iyye ile ârifân Papa Mardiros v. İstefan ve Serkiz v. Kedaroz? nâm Ermeniler şehâdetleriyle <<şer‘an >> sâbit olmağla vekâleten meclis-i şer‘-i şerîf-i enverde bi’l-asâle ve bi’l-vekâle işbu râfi‘u’s-sifr Serkiz v. Kirkor muvâcehesinde ikrâr ve takrîr-i kelâm edip babamız hâlik-i mezbûrun ile’l-helâk yedinde olup ba‘de helâkihî bize intikāl ve isâbet eden mahalle-i mezbûrede vâki‘ bir tarafdan Kirkor mülkü ve bir tarafdan Saka Kirkor mülkü ve bir tarafdan Kalfa Ermeni mülkü ve bir tarafdan tarîk-i âm ile mahdûd menzilimi cümle tevâbi‘i ile bundan akdem iki yüz elli guruş semen-i makbûza merkūm Serkiz’e bey‘ ve teslîm ol dahi iştirâ ve kabz etmişidi lâkin bey‘-i mezbûr tağrîr ve gabn-i fâhiş ile olmuş idi deyü menzil-i mahdûd-ı mezbûru merkūm Serkiz’den bi’l-asâle ve bi’l-vekâle taleb ve da‘vâ eylediğimde beynimizde münâza‘ât-ı kesîre ve muhâsamât-ı ekîde vâkı‘a olmuş idi el-hâletü hâzihî beynimize muslihûn tavassut edip merkūm Serkiz da‘vâ-yı mezkûremden benimle yirmi guruş üzerine sulh olduğunda ben dahi ber-vech-i muharrer bi’l-asâle ve bi’l-vekâle sulh-ı mezbûru kabûl ve bedel-i sulh olan meblağ-ı mezbûr yirmi guruşu merkūm Serkiz yedinden bi’l-asâle ve bi’l-vekâle ahz u kabz eyledim baʻde’l-yevm husûs-ı mezkûra müte‘allika mezbûr Serkiz ile da‘vâ ve nizâ‘ımız kalmayıp bi’l-asâle ve bi’l-vekâle zimmetini ibrâ-i âm ile ibrâ ve iskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî-gurreti Cumâdelâhire sene 1121 Şuhûdü’l-hâl: İbrahim Efendi b. Kemaleddin el-İmâm, Molla İbrahim b. Ahmed el-Müezzin, Lütfullah el-Müezzin, Abdurrahim b. Mustafa Kayyum, Mehmed Çelebi b. Ahmed, Berber Halil b. İbrahim, Mustafa Çelebi Attâr, Berber Abdülbâki, Mustafa b. Şa‘ban, Mehmed b. Ali ve gayruhum mine’l-huzzâr. Kabril v. Minas, Papa Karabet v. Norsiz, Papa Ağya v. Agop.