Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 292 Hüküm no: 298 Orijinal metin no: [40b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Kemal Mahallesi’nden vefât eden Hacı Hüseyin b. Oruc ile torunu Ümmühâni’nin vârislerinin bir menzildeki köşke ait vakıf ve mülkiyet anlaşmazlığında vakfın mütevellîsi ve menzilin kiracısıyla sulh oldukları Mahmiye-i İstanbul’da Esirci Kemal Mahallesi’nde sâkin iken bundan akdem vefât eden el-Hâc Hüseyin b. Oruc b. ( ) verâseti zevce-i metrûkesi Ümmühani bt. Mustafa ile ümm-i veledi Fâtıma’dan mütevellide sagīre kızı diğer Ümmühani’ye münhasıra olup ba‘dehû sagīre-i mezbûre diğer Ümmühani dahi fevt olup verâseti mezbûre Fâtıma’ya münhasıra olduğu şer‘an zâhir ve müte‘ayyin oldukdan sonra zâtı Mehmed Çelebi b. Abdi ve es-Seyyid Hüseyin Çelebi b. Mehmed ta‘rîfleriyle mu‘arrefe olan mezbûre Fâtıma mahfil-i kazâda merhûm el-Hâc Ya‘kub Kethüdâ Vakfı’na bi’l-fi‘il mütevellî olan işbu bâ‘isü’l-kitâb es-Seyyid Mehmed Efendi b. es-Seyyid Ahmed mahzarında ikrâr ve takrîr-i kelâm edip vakf-ı mezbûr müstagallâtından olup mahalle-i mezbûrede vâki‘ bir tarafdan Ömer Efendi zevcesi menzili ve bir tarafdan Mehmed Çelebi menzili ve bir tarafdan Çadırcı Ahmed Vakfı’ndan [41a] el-Hâc Osman tasarrufunda olan menzil ve bir tarafdan tarîk-i âm ile mahdûd büyût-ı adîdeyi müştemil menzilin dâhiliyesinde vâki‘ iki kârgîr mahzen üzerinde bir köşk ve zîr-i zemîn bundan akdem İshak Efendi kethüdâsı demekle ma‘rûf Mahmud Ağa nâm kimesne bi’l-icâreteyn mutasarrıf iken kendi mâlı ile nefsiʼçün binâ ve ihdâs edip ba‘de vefâtihi veresesi zikr olunan mahzeni mülk olmak üzere müteveffâ-i evvel mezbûr el-Hâc Hüseyin’e semen-i ma‘lûma bey‘ ol dahi ber-vech-i muharrer iştirâ ve menzil-i mezbûrun mâ‘adâsını dahi taraf-ı vakfdan istîcâr edip bir müddet tasarrufundan sonra mezbûr el-Hâc Hüseyin dahi vefât edip ebniye-i memlûke-i mezbûre veresesine intikāl edip mütevellî-i mezbûr ebniye-i mezbûreyi vakıf olmak üzere zabt eder deyü mûceb-i şer‘îsini da‘vâ ve ber-vech-i muharrer mülkiyetini isbât sadedinde iken muslihûn tavassut sulh her vechile vakfa evlâ ve enfa‘ olmağla mütevellî-i mezbûr beni da‘vâ-yı mezbûremden re’y-i hâkimü’ş-şer‘le yüz guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz guruşu mâl-ı vakf-ı mezbûrdan olmak üzere mütevellî-i mezbûr yedinden ahz u kabz eyledim min-ba‘d [husûs-ı] mezbûra müte‘allika aslâ da‘vâ ve nizâ‘ım olmayıp menzil-i mezbûra bi’l-icâreteyn mutasarrıf el-Hâc Mustafa b. Osman’ın zimmetini ve taraf-ı vakfı ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. [Fî] 26 min-Cumâdelûlâ sene 1121 Şuhûdü’l-hâl: İmâm Ahmed Efendi b. Mustafa, Mehmed Efendi b. el-Hâc Hasan, Mehmed Çelebi b. Abdullah, el-Hâc Osman b. ( ), Abdurrahman Çelebi, Haffâf el-Hâc Ali, Haffâf el-Hâc Ahmed, Abdullah Çavuş, Mustafa Çelebi b. ( ) ve gayruhum mine’l-huzzâr.