Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 293 Hüküm no: 299 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Kemal Mahallesi’nden Hacı Mustafa b. Osman’ın Yakub Kethüda Vakfı’ndan olup kiracısı olduğu evdeki mülk köşkten dolayı Hacı Hüseyin’in vârislerine ödediği elli guruşu vakfa bağışladığı Mahmiye-i İstanbul’da Esirci Kemal Mahallesi’nde sâkin el-Hâc Mustafa b. Osman nâm kimesne mahfil-i kazâda merhûm Ya‘kub Kethüdâ Vakfı’na bi’l-fi‘il mütevellî olan es-Seyyid Mehmed Efendi b. es-Seyyid Ahmed nâm kimesne mahzarında ikrâr ve takrîr-i kelâm edip vakf-ı mezbûr müstagallâtından hâlâ bi’l-icâreteyn taht-ı tasarrufunda olup mahalle-i mezbûrda vâki‘ ma‘lûmü’l-hudûd menzilde olan kârgîr mahzen üzerinde vâki‘ bir köşk bundan akdem vefât eden el-Hâc Hüseyin nâm kimesnenin mülküdür ba‘de vefâtihi veresesine intikāl eyledi deyü yine müteveffâ-i mezbûrun veresesinden Fâtıma Hatun huzûr-ı hâkimü’ş-şer‘de mütevellî-i mezbûrdan da‘vâ edip ve müdde‘âsını isbât sadedinde iken mütevellî-i mezbûr dahi müdde‘iye-i mezbûreyi sulh vakfa enfa‘ olmağla bedel [re’y]-i hâkimü’ş-şer‘le yüz guruş üzerine sulh eyledikde ol dahi sulh-ı mezbûru kabûl ve bedel-i sulh olan yüz guruşu mâl-ı vakf-ı mezbûrdan olmak üzere müteveffâ-i mezbûr yedinden ahz u kabz eylemişidi lâkin menzil-i mezbûr benim taht-ı icâremde olmağla mütevellî-i mezbûrun bedel-i sulh deyü verdiği yüz guruşun elli guruşunu kendi rızâsıyla ben dâmin olup meblağ-ı mezbûr elli guruş mütevellî-i mezbûra ve vakfa teberru‘ eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Cumâdelûlâ li-sene 1121 Şuhûdü’l-hâl: Es-sâbikūn, es-sâbikūn, es-sâbikūn, es-sâbikūn.